Samsung kompaniyasi Galaxy S22 smartfonlari va Galaxy Tab S8 planshetlarining yangi liniyasini taqdim etdi.
Janubiy Koreya kompaniyasi Apple bilan raqobat qilish uchun smartfon strategiyasini moslashtirmoqda. Bundan tashqari, Galaxy Tab S8 planshetining taqdimoti ham bo‘lib o‘tdi.
Smartfonlar 3 ta model bilan ifodalanadi: S22, S22+ va S22 Ultra.
S22 6,1 dyuymli, S22+ 6,6 dyuymli ekranga ega. S22 Ultra’da 6,8 dyuymli displey va stilus mavjud.
Galaxy S22 va S22+ 50 megapikselli asosiy kamera, 10 megapikselli tele-foto linza va 12 megapikselli ultrakeng burchakli linzalarni o‘z ichiga olgan uch kamerali tizimga ega. Bundan tashqari smartfonlar 10 kishining har biriga fokusni avtomatik ravishda sozlaydigan AutoFraming bilan jihozlangan.
S22 Ultra’da 108 megapikselli asosiy kamera va ikkita 10 megapikselli tele-foto linzalar mavjud. Bu esa obyektni 100 martagacha kattalashtirish imkonini beradi.
Galaxy S22, S22+ va S22 Ultra Galaxy seriyasidagi smartfonlarga tarixda birinchi bo‘lib 4 nanometrli protsessor o‘rnatildi. Bu smartfonlarga katta hajmdagi vazifalarni bajarishga imkon berishi aytilmoqda.
Qayd etilishicha, S22+ va S22 Ultra 5G tarmoqlariga ulanishi mumkin.
Smartfonlar 11-martdan sotuvga chiqariladi. S22 Ultra smartfonlarining narxi 1 199 dollardan boshlab sotilishi aytilmoqda.
Bundan tashqari, Samsung uchta yangi planshetni taqdim etdi: Galaxy Tab S8, S8+ va S8 Ultra. Ular xuddi smartfonlar kabi 11-martdan sotuvga chiqariladi. Tab S8 Ultra modeli 1 099 dollardan boshlab sotiladi.
Bloomberg ma’lumotlariga ko‘ra, Samsung o‘zining smartfon strategiyasida so‘nggi yillarda eng katta o‘zgarishlarni amalga oshirmoqda.
Izoh (0)