O‘zbekiston bozoriga katta rejalarga ega bo‘lgan USM Telecom kompaniyasining boshqaruvchisi o‘zgardi

Boris Dobrodeyev USM Telecom bosh direktori etib tayinlandi. Bu haqda “Kommersant” ma’lumot berdi.

Bundan oldin Dobrodeyev VK internet holdingi (“Mail.ru” Group, VKontakte va “Odnoklassniki” ijtimoiy tarmoqlarini nazorat qiladi) rahbari bo‘lgan edi.

USM Telecom va O‘zbekiston

USM Telecom — Alisher Usmonovga tegishli bo‘lgan USM Holdingning asosiy telekommunikatsiya va IT aktivlarini birlashtiruvchi kompaniya.

2021-yilda USM Telecom O‘zbekistonga kirib kelgan va o‘sha yili Digital Holding qo‘shma korxonasini tuzish bosqichini yakunlagan edi. 

Qo‘shma korxona tarkibiga Ucell aloqa operatorining 100 foiz ustav kapitali, USM sho‘ba korxonalari — CRPT Turon va ICS Holding Uzbekistan kirishgan. 

Shuningdek, Rossiya tomoni Digital Holding kompaniyasini rivojlantirish uchun 100 million dollar sarmoya kiritadi. 

Qo‘shma korxonaning 51 foiz ulushi MegaFon va USM Telecom qo‘shma korxonasi Digital Invest’ga, 49 foizi esa O‘zbekiston Davlat aktivlarini boshqarish agentligiga tegishli.

USM Telecom ishtirokida tuzilgan kompaniya O‘zbekistonga katta rejalarga ega.

Digital Holding quyidagilar bilan shug‘ullanadi:

• elektron tijoratni rivojlantirish bo‘yicha maslahatlar;
• markalash tizimini yaratishda ishtirok etish;
• raqamli bozorni amalga oshirish;
• moliyaviy, to‘lov va sodiqlik xizmatlari tizimini yaratish;
• yangi telekommunikatsiya tuzilmasini qurish va boshqalar.