Toshkent shahar Beruniy–Farobiy ko‘chalari chorrahasida joylashgan 6 ta radar va kamera o‘rnatish joylari kimoshdi savdosida sotildi.
Radar va kamera o‘rnatish joylari Toshkent shahar Mirzo Ulug‘bek tumani IIV tomonidan auksionga qo‘yilgan edi.
Auksion 8-fevral kuni bo‘lib o‘tgan. Boshlang‘ich narxi 6,75 mln so‘m bo‘lgan kimoshdi savdosi qariyb 30 daqiqa davom etdi. “Microyol” MChJ 1,31 mlrd so‘m taklif qilib g‘olib bo‘ldi.
Kimoshdi savdosi g‘olibiga bir nechta majburiyatlar yuklatilgan. Yo‘l harakati qoidalari notog‘ri aniqlangan holatlar tasdiqlanadigan bo‘lsa, bunda ularni sodir etgan deb e’tirof etilgan shaxsga yetkazilgan barcha moddiy zarar qoplanishi kerak.
Auksion orqali radar
Tadbirkorlarga joriy yilning 1-martidan boshlab yo‘llarga kameralar va radarlar o‘rnatishga ruxsat berilgan. Yer uchastkalari onlayn auksionlar orqali taqdim etiladi.
Auksion g‘oliblari uchastkalarni boshqa tadbirkorlarga o‘tkazish huquqi bilan cheklanmagan muddatga oladi. 2021—2022-yillarda shu tarzda 3356 ta videokamera va 763 ta radar o‘rnatish rejalashtirilgan.
Bunday lotlar katta talabga ega. Auksion paytida narxlar o‘n martalab oshishi mumkin. Masalan, iyul oyida Xorazmdagi bitta hudud 40 mln so‘mga yoki boshlang‘ich bahosidan 27 baravar qimmatga sotib olingan.
Ma’lumot uchun, 2021-yil iyun oyidan boshlab O‘zbekistondagi chorraha va yo‘llarda radar va kameralar qo‘yish joylari auksion orqali savdoga qo‘yilishi boshlandi. 1-iyul kuni E-auksion saytida birinchi bor Toshkent shahrida radar o‘rnatiladigan joylar auksionga chiqarildi.
Avvalroq O‘zbekistonda dekabr oyida o‘rnatilgan fotoradarlar to‘g‘risida ma’lumot berilgandi. Unga ko‘ra, o‘tgan bir oy ichida Qoraqalpog‘istonda 2 ta, Qashqadaryo viloyatida 5 ta, Buxoro viloyatida 8 ta, Toshkent shahrida 11 ta statsionar, shuningdek, Samarqand viloyatida 25 ta, Farg‘ona viloyatida esa 4 ta YHQ radarlari o‘rnatilgan.
Izoh (0)