Belarus prezidenti Aleksandr Lukashenko respublika prezidentligiga sobiq nomzod, Belarus muxolifati yetakchisi Svetlana Tixanovskayaning davlat korxonasidan 15 ming dollar qarzi borligini aytdi. Bu haqda u “Solovyev Live” YouTube-kanaliga bergan intervyusida gapirdi.
“Ozroq qarzdor. Lekin, bu holatda gap pulda emas”, — dedi Lukashenko. Uning aniqlik kiritishicha, gap 15 ming dollar haqida ketmoqda. Tixanovskaya pullarni qaytaradimi, degan savolga Lukashenko “u bilan aloqamiz yo‘q” deb javob berdi.
“Pochta orqali qaytarsa ham bo‘lardi, ayniqsa, pullar xususiy emas, davlat korxonalariga tegishli. Bizda uning pul olganini tasdiqlaydigan hamma narsa bor. Shuning uchun u bu mavzuga to‘xtalmaslik yaxshiroqligini tushunadi... Men bu masalani ko‘tarmayman, u ham jim”, — deya qo‘shimcha qildi Lukashenko.
2020-yil avgust oyida Tixanovskaya Belarusdagi prezidentlik saylovlarida muxolifatdan yagona nomzod sifatida qatnashgandi. Belarus Markaziy saylov komissiyasi ma’lumotlariga ko‘ra, Tixanovskaya 80 foiz ovoz olgan Aleksandr Lukashenkodan keyin 10 foiz ovoz bilan ikkinchi o‘rinni egallagandi. Tixanovskaya ushbu natijani tan olmadi. Saylovdan keyin Belarusda Lukashenkoga qarshi norozilik namoyishlari boshlandi va bir necha oy davom etdi.
Avvalroq Svetlana Tixanovskaya 2022-yilgi tinchlik bo‘yicha Nobel mukofotiga nomzod sifatida ko‘rsatildi.
Mavzuga doir:
- Tixanovskaya Belarus muxolifatining rejalari haqida so‘zlab berdi
- Belarus muxolifati yetakchisi Svetlana Tixanovskaya Oq uyda Jo Bayden bilan uchrashdi
- Belarus muxolifati yetakchisi Svetlana Tixanovskayaning turmush o‘rtog‘i Sergey Tixanovskiy 18 yilga qamaldi. U 2020-yilda saylovda ishtirok etmoqchi bo‘lgan, biroq yakunda saylovda rafiqasi qatnashgan
Izoh (0)