AQSh prezidenti Jo Bayden fransiyalik hamkasbi Emmanuel Makron bilan telefon orqali muloqot qildi, deyiladi Oq uy saytida.
Davlat rahbarlari “Ukraina chegarasida Rossiya harbiy kuchlarining oshirilishiga javoban davom etayotgan diplomatiya va oldini olish choralarini” muhokama qildi. Ular o‘zaro, shuningdek, “ittifoqchilar va hamkorlar, jumladan, Ukraina” bilan aloqalarni davom ettirishga kelishib oldi.
Bayden va Makron oxirgi marta 2-fevral kuni qo‘ng‘iroqlashgan edi. O‘shanda ular “diplomatiya sohasida, Rossiya Ukrainaga bostirib kirgan taqdirda unga tez va jiddiy iqtisodiy zarba berishga tayyorgarlik ko‘rish bo‘yicha davom etayotgan muvofiqlik masalalarini ko‘rib chiqqan.”
Makron 7-fevral kuni Moskvaga keladi va Rossiya prezidenti Vladimir Putin bilan muzokaralar o‘tkazadi.
Rossiya prezidenti matbuot kotibi Dmitriy Peskov Fransiya rahbarining bo‘lajak tashrifini “juda muhim” deb atadi, uning so‘zlariga ko‘ra, kun tartibida ko‘plab mavzular bor. Makronning aytishicha, muhokamaning asosiy mavzusi Rossiya—Ukraina chegarasidagi vaziyat yuzasidan keskinlikni yumshatish bo‘ladi.
Makron va Putin o‘rtasidagi muzokaralardan so‘ng qo‘shma konferensiya o‘tkaziladi, — dedi Peskov.
Uchrashuv arafasida Fransiya va Rossiya prezidentlari bir necha bor telefon orqali gaplashib, Ukraina atrofidagi vaziyat hamda Moskva tomonidan AQSh va NATOga taqdim etilayotgan xavfsizlik kafolatlarini muhokama qilgan.
Putin Fransiya prezidentiga G‘arb Rossiyaning xavfsizlik bo‘yicha takliflariga javoban e’tiborsiz qoldirgan mavzularni sanab o‘tdi: alyansning sharqqa kengayishiga yo‘l qo‘ymaslik, Rossiya chegaralari yaqinida zarba beruvchi qurol tizimlarini joylashtirmaslik va NATOning 1997-yildagi pozitsiyalariga qaytishi kabi.
Makron Moskvaga safaridan so‘ng Kiyevga boradi va u yerda Ukraina prezidenti Vladimir Zelenskiy bilan uchrashadi.
Izoh (0)