4-fevral kuni mustaqil kuzatuvchilar Birlashgan Millatlar Tashkiloti Xavfsizlik kengashining Shimoliy Koreyaga qarshi sanksiyalar bo‘yicha qo‘mitasiga hisobot taqdim etdi. Mutaxassislarning aniqlashicha, KXDR hukumati yadroviy raketalar ishlab chiqarishni kriptovalyuta yordamida moliyalashtirmoqda. Bu haqda Reuters xabar berdi.
Hujjatlarga ko‘ra, 2020-yil boshidan 2021-yil o‘rtalarigacha Shimoliy Koreya xakerlari kamida uchta kriptobirjadan 50 million dollarlik raqamli aktivlarni o‘g‘irlagan. Kriptovalyuta platformalariga qilingan kiberhujumlar natijasida yig‘ilgan mablag‘larning umumiy miqdori 400 million dollarga yetdi.
“Shimoliy Koreya AQSh va boshqa davlatlar tomonidan kiritilgan sanksiyalar natijasida jahon moliyaviy tizimidan uzilib qolgan. Shu sababli ular dunyodagi vaziyatni beqarorlashtirishga qaratilgan qurol yaratish dasturlari va boshqa tadbirlarini moliyalashtirish uchun kriptovalyutalarni o‘g‘irlashga hamda banklarni talon-taroj qilishga majbur bo‘lmoqda”, — dedi TRM Labs blokcheyn kompaniyasining tahlilchisi Nik Karlsen.
Shimoliy Koreya hukumati o‘g‘irlangan raqamli aktivlarning bir qismini yadroviy va ballistik raketalarni yaratish dasturlariga sarflagan.
AQSh, Yaponiya va Janubiy Koreya ma’lumotlariga ko‘ra, Shimoliy Koreya yanvar oyida to‘qqizta raketa sinovlarini amalga oshirgan. Xususan, 30-yanvar kuni mamlakat tezligi tovush tezligidan 16 marta yuqori bo‘lgan o‘rta masofaga mo‘ljallangan ballistik raketani uchirdi.
Ayni paytda AQSh Shimoliy Koreyaning raketa sinovlariga javob tayyorlamoqda. Shimoliy Koreya bo‘yicha Amerika maxsus vakili Son Kim yaqin kunlarda janubiy koreyalik va yaponiyalik hamkasblari bilan yangi aloqalar o‘rnatishi xabar qilingan.
Izoh (0)