Беларусь президенти Александр Лукашенко республика президентлигига собиқ номзод, Беларусь мухолифати етакчиси Светлана Тихановскаянинг давлат корхонасидан 15 минг доллар қарзи борлигини айтди. Бу ҳақда у «Соловев Live» YouTube-каналига берган интервьюсида гапирди.
«Озроқ қарздор. Лекин, бу ҳолатда гап пулда эмас», — деди Лукашенко. Унинг аниқлик киритишича, гап 15 минг доллар ҳақида кетмоқда. Тихановская пулларни қайтарадими, деган саволга Лукашенко «у билан алоқамиз йўқ» деб жавоб берди.
«Почта орқали қайтарса ҳам бўларди, айниқса, пуллар хусусий эмас, давлат корхоналарига тегишли. Бизда унинг пул олганини тасдиқлайдиган ҳамма нарса бор. Шунинг учун у бу мавзуга тўхталмаслик яхшироқлигини тушунади... Мен бу масалани кўтармайман, у ҳам жим», — дея қўшимча қилди Лукашенко.
2020 йил август ойида Тихановская Беларусдаги президентлик сайловларида мухолифатдан ягона номзод сифатида қатнашганди. Беларусь Марказий сайлов комиссияси маълумотларига кўра, Тихановская 80 фоиз овоз олган Александр Лукашенкодан кейин 10 фоиз овоз билан иккинчи ўринни эгаллаганди. Тихановская ушбу натижани тан олмади. Сайловдан кейин Беларусда Лукашенкога қарши норозилик намойишлари бошланди ва бир неча ой давом этди.
Аввалроқ Светлана Тихановская 2022 йилги тинчлик бўйича Нобель мукофотига номзод сифатида кўрсатилди.
Мавзуга доир:
- Тихановская Беларусь мухолифатининг режалари ҳақида сўзлаб берди
- Беларусь мухолифати етакчиси Светлана Тихановская Оқ уйда Жо Байден билан учрашди
- Беларусь мухолифати етакчиси Светлана Тихановскаянинг турмуш ўртоғи Сергей Тихановский 18 йилга қамалди. У 2020 йилда сайловда иштирок этмоқчи бўлган, бироқ якунда сайловда рафиқаси қатнашган
Изоҳ (0)