Belarus muxolifati yetakchisi Svetlana Tixanovskaya 2022-yilgi tinchlik bo‘yicha Nobel mukofotiga nomzod sifatida ko‘rsatildi. Bu haqda uning vakili Franak Vyachorak o‘zining Twitter’dagi sahifasi orqali ma’lum qildi.
“Norvegiya parlamentariylari Vervik Bulestad va Xarek Elveden Svetlana Tixanovskayani Belarus fuqarolarining o‘z ozodligi uchun davom etayotgan kurashlari ramzi sifatida tinchlik bo‘yicha Nobel mukofotiga nomzod sifatida ko‘rsatdi”, — deyiladi xabarda.
Bulestad mahalliy Xristian-demokratik partiya yetakchisi, Elvensen esa Norvegiya Konservativ partiyasi vakili hisoblanadi.
Ta’kidlash kerakki, Tixanovskaya 2021-yilda ham Nobel mukofotiga nomzod sifatida ko‘rsatilgan edi, biroq reytingi yuqori bo‘lganiga qaramay, unga loyiq ko‘rilmagandi. Shuningdek, o‘tgan yili Checheniston rahbari Ramzan Qodirov ham tinchlik bo‘yicha Nobel mukofotiga nomzod sifatida ko‘rsatilgandi.
Eslatib o‘tamiz, 8-oktabr kuni tinchlik bo‘yicha Nobel mukofotiga Rossiyaning “Novaya gazeta” nashri bosh muharriri Dmitriy Muratov va filippinlik jurnalist, Rapple muxolifatchi sayti rahbari Mariya Ressa sazovor bo‘ldi. Nobel mukofoti ularga “demokratiya hamda barqaror tinchlik o‘rnatilishining dastlabki sharti bo‘lgan fikr bildirish erkinligini himoya qilish bo‘yicha intilishlari” uchun berilgan.
Izoh (0)