Kanada poytaxti Ottavada yuk mashina haydovchilarining koronavirus cheklovlariga qarshi noroziliklari tufayli favqulodda holat e’lon qilindi, deb xabar beradi CBC.
“Favqulodda holat rejimining e’lon qilinishi davom etayotgan namoyishlar shahar aholisiga jiddiy xavf va tahdid tug‘dirishini anglatadi hamda boshqa yurisdiksiyalar va hukumat darajalari tomonidan qo‘llab-quvvatlov zarurligini bildiradi”, — deydi shahar meri Jim Uotson.
Shahar rasmiylarining ta’kidlashicha, mahalliy favqulodda holat Ottavaga muhim xizmatlarni boshqarish va xaridlarni yanada moslashuvchan qilish uchun samaraliroq ishlash imkonini beradi.
Bunga qadar Uotson Ottava hukumati va politsiyasi norozilik namoyishlariga bog‘liq vaziyatni endilikda nazorat qilmayotganini ma’lum qilgan edi. Politsiya rahbari Piter Sloli namoyishlarni to‘xtatish uchun xodimlari yetmasligini tan olgan.
5-fevral kuni Kanada poytaxtidagi norozilik namoyishi ishtirokchilari soni 5 ming kishiga yetgan. Aksiyaga mahalliy aholi va boshqa shaharlardan kelgan kanadaliklar kelib qo‘shilgan.
Namoyishchilar pandemiya bilan bog‘liq barcha cheklovlarni bekor qilinishini talab qilyapti. Mahalliy, viloyat va federal siyosatchilar namoyishchilarning harakatlarini qoralagan.
Eslatib o‘tamiz, yanvar o‘rtalarida Germaniyada koronavirus cheklovlariga qarshi yana bir norozilik namoyishlari bo‘lib o‘tgandi. Shuningdek, Belgiya va Chexiyada koronavirus cheklovlariga qarshi norozilik aksiyasi bo‘lib o‘tgani to‘g‘risida xabar berilgandi. Xususan, Bryusselda bir necha ming kishi qo‘llariga majburiy vaksinatsiyaga qarshi plakatlarni ko‘tarib olgan holda Yevropa dahasiga qadar marsh yurgan.
Izoh (0)