Xitoyning Vyetnam bilan chegaraga yaqin joylashgan Bayse shahri (Guansi-Chjuan avtonom tumani) ma’muriyati COVID-19 ga chalinish holatlarining ortishi munosabati bilan shaharda 7-fevraldan lokdaun joriy etilganini e’lon qildi. Bu haqda “Interfaks” xabar berdi.
3,6 million aholiga ega shaharda o‘tgan ikki kun davomida koronavirusni mahalliy yuqtirish bo‘yicha 99 ta holat qayd etilgan. Shulardan ikkitasi koronavirusning yanada yuqumliroq omikron shtammiga to‘g‘ri keladi.
Rasmiylarning buyrug‘iga ko‘ra, aholi uyda qolishi, faqat eng zarur narsalarni sotib olish va COVID-19 ga test topshirish uchun ko‘chaga chiqishi kerak. Shuningdek, aholidan tovarlarni uyga yetkazib berish xizmatidan foydalanish, do‘konlarga bormaslik so‘raldi. Maktablar faoliyati to‘xtatildi.
Vaqtinchalik taqiq barcha safarlar (o‘ta zarur holatlardan tashqari) bilan birga jamoat transporti faoliyatiga ham joriy etildi, hududdagi xalqaro chegara yopildi. Hayot uchun zarur xizmat ko‘rsatish sohalarining ishchilari Bayse bo‘ylab faqat maxsus yo‘llanmalar bilan harakatlanishi mumkin.
OAV ta’kidlashicha, Bayse shahridagi lokdaun Pekinda 4—20-fevral kunlari davom etadigan qishki Olimpiya o‘yinlari va Oy taqvimi bo‘yicha yangi yil munosabati bilan yuzaga kelgan sayohat mavsumi fonida joriy qilingan.
Ma’lumotlarga ko‘ra, Xitoyning kamida 10 ta provinsiyasi va hududlarida omikron shtammi aniqlangan.
2022-yil boshida Xitoyda 1,2 million aholiga ega Yuchjou shahri, undan avval 13 million aholiga ega Sian shahri lokdaunga yopilgandi.
Izoh (0)