Germaniyalik muhandislar Zigen shahri yaqinidan o‘tgan A45 federal avtomagistralidagi Rinsdorf ko‘prigini portlatish yo‘li bilan qulatib, mamlakatda yangi rekord o‘rnatdi. Bu haqda Deutsche Welle xabar berdi.
Nashr ma’lumotlariga ko‘ra, soha mutaxassislari Germaniyaning Shimoliy Reyn-Vestfaliya shtatidagi A45 avtobaniyasidagi yo‘l o‘tkazgichni yo‘q qilish uchun 120 kilogrammga yaqin portlovchi moddadan foydalangan. Ko‘prikning balandligi 70 metr, kengligi esa 500 metr edi. Mazkur portlatish Germaniyada yangi rekord o‘rnatdi, chunki mamlakatda hali bunday balandlikdagi ko‘priklar portlatilmagan.
55 yillik inshootning qulashini tomosha qilish uchun o‘nlab odamlar yig‘ildi. Buzish bo‘yicha mutaxassis Maykl Shnayder portlash haqida signal berganidan so‘ng ko‘prikning 16 ta ustuni qoq o‘rtasidan bukilib, yo‘l qoplamasi yerga qulagan.
Ko‘prikni qulatish shunday tashkil etilganki, vayronalar oldindan tayyorlab qo‘yilgan poydevorga tushadi va nariroqdagi yangi ko‘prikka zarar yetkazmaydi. Yangi ko‘prik 2021-yil dekabr oyida ochilgan edi.
Kelgusi ikki oy davomida bu yerdagi vayronalar tozalanadi, so‘ngra ushbu tezyurar yo‘lning qatnov qismini kengaytirish loyihasi doirasida yangi yo‘l o‘tkazgich qurilishi boshlanadi.
Germaniyaning aholi eng zich joylashgan Shimoliy Reyn-Vestfaliya shtatida 60 ga yaqin yo‘l o‘tkazgichlar almashtirish yoki shoshilinch ta’mirlashga muhtojligi aytilmoqda, ulardan 15 tasi esa qurilish bosqichida.
Mavzuga doir:
Izoh (0)