3-fevral kuni Toshkentning Yunusobod tumanida daraxtlarning tagi betonlab ketildi, so‘ng Obodonlashtirish boshqarmasi xodimlari tomonidan qayta tozalandi. “Daryo” muxbiri holat joyiga borib, vaziyatni o‘rgandi.
Eslatib o‘tamiz, 2021-yilning dekabr oyida aynan shu hududda 18 tup daraxtning 10 tupi noma’lum shaxslar tomonidan yarmigacha arralab ketilgan edi. 2022-yilning 10-yanvarga o‘tar kechasi Toshkent shahrining Yunusobod tumanida noma’lum shaxslar 4 tup eldor qarag‘ayini kesib tashlagandi. Keyinroq 10 ta qarag‘ay arralab ketilgani bo‘yicha jinoyat ishi qo‘zg‘atilgan edi. Shundan keyin zarar yetkazilgan daraxtlar mahalla aholisi hamda ekologlar tomonidan skotch bilan o‘ralgan.
Mahalla faollaridan biri Nigora Abduqodirovaning aytishicha, unga soat 18:00 larda qo‘shnilari telefon qilib, daraxtlar tagi betonlanayotganini aytishgan.
“Qo‘shnilarim daraxtlarni investorlar kelib kesishyapti, beton quyishyapti, deyishdi. Uydan pastga tushsak, urush-janjal bo‘lyapti ekan. Tadbirkorlar 15-18 nafar mardikor olib kelishgan. Mahalla aholisini itarib yuborib, ketmon bilan turtishyapti. Shundan keyin biz ichki ishlar bo‘limiga murojaat qildik. Keyin esa ekologlar Obodonlashtirish boshqarmasi xodimlarini olib kelib, betonlarni tozalatishyapti”, — deydi u.
“Bu yerga daraxt ekishni rejalashtirgan edik. Yerni auksionga yutib olgan tadbirkor u yerda o‘quv markazi quramiz, deb aytgan. Keyin esa nogironlarni olib kelib ular uchun o‘quv markaz quramiz, deyishdi. Keyin xalqni aldashni boshlashdi, sizlar uchun novvoyxona, somsaxona qilib beramiz, deb”, — deydi mahalla faollaridan biri.
Toshkent shahar Ekologiya va atrof-muhitni muhofaza qilish boshqarmasi inspektori Sardor Niyazovning “Daryo”ga ma’lum qilishicha, ushbu joy tadbirkor tomonidan auksionda yutib olingan.
“Bu yerda 2021-yilning dekabr oyida daraxtlar kesib ketilgandi. Keyin Ekologiya boshqarmasi Ilmiy tadqiqot instituti hamda Botanika mutaxassislari bilan birgalikda davolash ishlari olib borilib, saqlab qolgan edik. Ushbu holat to‘g‘risida surishtiruv ishlari ichki ishlar xodimlari tomonidan olib boriladi”, — deya qo‘shimcha qiladi u.
Toshkent shahar ichki ishlar bosh boshqarmasi ekopolitsiya safdor xodimi Doston Uralovning aytishicha, ular kelguniga qadar daraxtlar tagiga beton to‘kkan ustalar ichki ishlar bo‘limiga olib ketilgan.
“Kelganimizda fuqarolar to‘planib, bu yerda janjal bo‘layotgan ekan. Holatga oydinlik kiritish maqsadida fuqarolar bilan gaplashsak tadbirkor kelib, daraxtlar ostiga beton to‘kib ketibdi. Shundan so‘ng Obodonlashtirish boshqarmasi xodimlarini chaqirtirdik. Ular kelib, daraxtlarning tagini tozalashayotganda tadbirkorning ukasi kelib, janjal ko‘tarmoqchi bo‘ldi. Ular ham ichki ishlar bo‘limiga olib borildi”, — deydi u.
Izoh (0)