Yunusobodda qurilish rejalashtirilgan hududdagi 4 ta qarag‘ay kesib tashlandi. Dekabrda bu yerdagi 10 ta qarag‘ay arralab ketilgandi

10-yanvarga o‘tar kechasi Toshkent shahrining Yunusobod tumanida noma’lum shaxslar 4 tup eldor qarag‘ayini kesib tashladi. Bu haqda O‘zbekiston Ekologiya va atrof-muhitni muhofaza qilish davlat qo‘mitasi matbuot xizmati xabar berdi.

2021-yil 14-dekabr kuni Amir Temur va Chinobod ko‘chalari chorrahasi yonida o‘sib turgan 18 tup daraxtning 10 tupi noma’lum shaxslar tomonidan yarmigacha arralab ketilgan edi. Hududda istiqomat qiluvchi aholining ta’kidlashicha, avvalroq ham daraxtlarni quritishga urinishlar bo‘lgan. Qurilish amalga oshishi kerak bo‘lgan hudud oldin o‘rab olingan, archalarni quritish uchun taglari kesib chiqilgan.

Daraxtlar o‘sib turgan uchastka elektron auksionda doimiy foydalanish huquqini qo‘lga kiritgan tadbirkorga poytaxt hokimligi tomonidan biriktirilgan.

“Gazeta.uz”ning yozishicha, auksion 2020-yilning yozida bo‘lib o‘tgan. Boshlang‘ich bahosi 168 million so‘mni tashkil etgan yer yakunda qariyb 1 milliard so‘mga sotilgan. Yer uchastkasining maydoni 115 kvadrat metr bo‘lib, hujjatlarda ofis binosi va novvoyxona qurish uchun taqdim etilgani ko‘rsatilgan.

Uchastkaga tutash ko‘p qavatli uylar aholisi qurilishga qarshi chiqqan. Toshkent shahar ekologiya va atrof-muhitni muhofaza qilish boshqarmasi daraxtlarni ko‘chirib o‘tkazishni rad etgan.

Kechasi 10 tup daraxt kesilgach, ekologlar botanika bog‘i mutaxassislarini jalb qilgan holda zararlangan daraxtlarni saqlab qolish uchun agrotexnik tadbirlarni amalga oshirgan. Qarag‘ay daraxtlari tanasidagi jarohatlar davolangan va yopilgan, daraxtlar raqamlangan. Shov-shuvlarga qaramay, daraxtlarga ikkinchi marta suiqasd uyushtirilgan. Fotosuratlarga qaraganda, ba’zi daraxtlarni kesishga ulgurishmagan.

Ekologiya davlat qo‘mitasi ma’lumotlariga ko‘ra, uchastkaga huquq egasi tadbirkor J.G. huquq-tartibot organlariga ekologlar ustidan ariza bilan murojaat qilgan. Unda aytilishicha, daraxtlarni ko‘chirib o‘tqazishdan bosh tortish uning huquqlarini buzadi. Sud uning shikoyatini qanoatlantirishni rad etgan.

“Mazkur uchastkadagi qonun buzilishi holatlarini o‘rganish bo‘yicha tuzilgan maxsus ishchi guruhi tomonidan to‘plangan ma’lumotlar bilan birga hujjatlar qonuniy chora ko‘rish uchun Yunusobod tuman prokuraturasiga taqdim etilgan. Ichki ishlar organlari bilan hamkorlikda daraxtlarga zarar yetkazgan shaxslarning shaxsini aniqlash choralari ko‘rilmoqda”, — deyiladi xabarda.

Shu kuni tunda hodisa joyiga Ekoqo‘m raisi o‘rinbosari Jusipbek Kazbekov boshchiligidagi qo‘mita vakillari tashrif buyurdi.

Qo‘mita bayonotida qayd etilishicha, o‘rmon fondiga kirmaydigan daraxtlarning kesilishiga joriy etilgan moratoriy muddatsiz davrga uzaytirilgan vaqtda yuz bergan bu holatni hech narsa bilan oqlab bo‘lmaydi. Qo‘mita rahbariyati huquqbuzarlarga nisbatan tez kunda qat’iy choralar ko‘rilishini izchil nazorat qiladi.

Avvalroq Jahongir Ortiqxo‘jayev Toshkentda daraxtlar kesilishida hokimlikning ham aybi borligini tan olgani, Toshkentda 81 ta daraxtning kesilishiga oid tergov ishi qayta tiklangani to‘g‘risida xabar berilgandi. “Respublikada ko‘kalamzorlashtirish ishlarini jadallashtirish, daraxtlar muhofazasini yanada samarali tashkil etish chora-tadbirlari to‘g‘risida”gi prezident farmoniga ko‘ra, O‘zbekistonda daraxt kesishga moratoriy muddatsiz davrga uzaytirilgan.