Ijtimoiy tarmoqlarda Toshkent axborot texnologiyalari universitetida kredit-modul tizimining xatosi sabab yakuniy imtihonlardan ko‘plab talabalar yiqilayotgani to‘g‘risida xabarlar tarqaldi. Oliy va o‘rta maxsus ta’lim vazirligining ma’lum qilishicha, mazkur masalani o‘rganish bo‘yicha mas’ullardan iborat tezkor ishchi guruh tuzilgan.
2-fevral kuni ijtimoiy tarmoqlarda TATU mas’ullarining xatosi tufayli talabalar bo‘lib o‘tgan yakuniylardan universitet hisobiga 300 million so‘mdan ortiq pul to‘lashi mumkinligi haqidagi e’tirozli xabar tarqaldi.
Oliy va o‘rta maxsus ta’lim vazirligi matbuot xizmatining ma’lumotlariga ko‘ra, mazkur masalani o‘rganish bo‘yicha mas’ullardan iborat tezkor ishchi guruh tuzilgan.
“Holat ishchi guruh tomonidan obyektiv va batafsil o‘rganiladi hamda natijasi bo‘yicha ma’lumot vazirlik rasmiy manbalari orqali qo‘shimcha e’lon qilinadi”, — deyiladi munosabatda.
Eslatib o‘tamiz, 2020-yil aprel oyida “Sharqshunoslik sohasida kadrlar tayyorlash tizimini tubdan takomillashtirish va ilmiy salohiyatni oshirish chora-tadbirlari to‘g‘risida” prezident qarori bilan Toshkent davlat sharqshunoslik instituti negizida Toshkent davlat sharqshunoslik universiteti tashkil etilgan, hujjatda universitetda ta’lim jarayoni bosqichma-bosqich kredit-modul tizimi asosida amalga oshirilishi belgilangandi.
May oyida esa Toshkent temiryo‘l muhandislari instituti, Toshkent avtomobil yo‘llarini loyihalash, qurish va ekspluatatsiyasi instituti va Toshkent davlat texnika universitetining aviakosmik texnologiyalari fakulteti negizida Toshkent transport universiteti tashkil etilishi, 2020/2021-o‘quv yilidan universitetda kredit-modul ta’lim tizimi joriy qilinishi haqida xabar berilgan.
Iyun oyida jamoatchilik muhokamasiga qo‘yilgan “Andijon qishloq xo‘jaligi va agrotexnologiyalar instituti faoliyatini tashkil etish hamda agrar ta’lim tizimini yanada takomillashtirish chora-tadbirlari to‘g‘risida”gi prezident qarori loyihasida ham institutda bakalavriat ta’lim yo‘nalishlarida ta’limning kredit-modul tizimini bosqichma-bosqich joriy etilishi xususida ma’lumot berilgandi. 2021-yil yanvarida esa O‘zbekistondagi OTMlarda o‘quv jarayoni bosqichma-bosqich kredit-modul tizimiga o‘tkazilishi ma’lum bo‘lgan.
Izoh (0)