O‘zbekistonning 3 ta hududida fuqarolarga yer maydonlari olib berish uchun pul talab qilgan shaxslar ushlandi

O‘zbekistonning 3 ta hududda fuqarolarga yer maydonlari olib berishni va’da qilgan firibgarlar ushlandi, deb xabar bermoqda Iqtisodiy jinoyatlarga qarshi kurashish departamenti.

Qayd etilishicha, Bosh prokuratura huzuridagi departamentning Xorazm viloyati boshqarmasi tomonidan IIB bilan hamkorlikda tezkor tadbir o‘tkazilgan. Unda fuqarolar S.M. va J.B. oldindan til biriktirib, “D.S.” hamda “A.S.” fermer xo‘jaliklariga qishloq xo‘jaligi faoliyati uchun ajratilgan 1,2 gektar yer maydonini fuqaro G.ga go‘yoki bo‘sh yer maydonligini aytib, maydonning 4 sotixini 200 million so‘mga sotishga kelishgani aniqlangan. Ular oldindan 10 million so‘mni olgan vaqtida ashyoviy dalillar bilan ushlangan.

Departament, Davlat xavfsizlik xizmati Qoraqalpog‘iston boshqarmalari IIV bilan o‘tkazilgan tezkor tadbirda fuqaro R.D. fuqaro I.ga tanishlari yordamida Nukus shahri Do‘stlik kanali bo‘yidan 5 ming dollar evaziga 6 sotix yer maydoni olib berishni va’da qilgani aniqlangan. U oldindan 20 million so‘mni olgan vaqtida ashyoviy dalillar bilan qo‘lga olingan.

Shuningdek, departamentning Navoiy viloyati boshqarmasi tomonidan o‘tkazilgan tezkor tadbirda fuqaro T.D. Karmana tumani “Bog‘ishamol” mahallasi hududidagi tanishi A.ga tegishli 6 sotix yer maydonini firibgarlik yo‘li bilan fuqaro N.ga sotishga kelishgani aniqlangan. U keyinchalik tanishlari orqali hokim qarorini chiqartirib berishini va’da qilgan holda xaridorga qalbaki hujjatlarni berib, evaziga 3 ming dollarni olgan vaqtida ashyoviy dalillar bilan ushlangan.

Mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari o‘tkazilmoqda.