3 февраль куни Тошкентнинг Юнусобод туманида дарахтларнинг таги бетонлаб кетилди, сўнг Ободонлаштириш бошқармаси ходимлари томонидан қайта тозаланди. «Дарё» мухбири ҳолат жойига бориб, вазиятни ўрганди.
Эслатиб ўтамиз, 2021 йилнинг декабрь ойида айнан шу ҳудудда 18 туп дарахтнинг 10 тупи номаълум шахслар томонидан ярмигача арралаб кетилган эди. 2022 йилнинг 10 январга ўтар кечаси Тошкент шаҳрининг Юнусобод туманида номаълум шахслар 4 туп элдор қарағайини кесиб ташлаганди. Кейинроқ 10 та қарағай арралаб кетилгани бўйича жиноят иши қўзғатилган эди. Шундан кейин зарар етказилган дарахтлар маҳалла аҳолиси ҳамда экологлар томонидан скотч билан ўралган.
Маҳалла фаолларидан бири Нигора Абдуқодированинг айтишича, унга соат 18:00 ларда қўшнилари телефон қилиб, дарахтлар таги бетонланаётганини айтишган.
«Қўшниларим дарахтларни инвесторлар келиб кесишяпти, бетон қуйишяпти, дейишди. Уйдан пастга тушсак, уруш-жанжал бўляпти экан. Тадбиркорлар 15-18 нафар мардикор олиб келишган. Маҳалла аҳолисини итариб юбориб, кетмон билан туртишяпти. Шундан кейин биз ички ишлар бўлимига мурожаат қилдик. Кейин эса экологлар Ободонлаштириш бошқармаси ходимларини олиб келиб, бетонларни тозалатишяпти», — дейди у.
«Бу ерга дарахт экишни режалаштирган эдик. Ерни аукционга ютиб олган тадбиркор у ерда ўқув маркази қурамиз, деб айтган. Кейин эса ногиронларни олиб келиб улар учун ўқув марказ қурамиз, дейишди. Кейин халқни алдашни бошлашди, сизлар учун новвойхона, сомсахона қилиб берамиз, деб», — дейди маҳалла фаолларидан бири.
Тошкент шаҳар Экология ва атроф-муҳитни муҳофаза қилиш бошқармаси инспектори Сардор Ниязовнинг «Дарё»га маълум қилишича, ушбу жой тадбиркор томонидан аукционда ютиб олинган.
«Бу ерда 2021 йилнинг декабрь ойида дарахтлар кесиб кетилганди. Кейин Экология бошқармаси Илмий тадқиқот институти ҳамда Ботаника мутахассислари билан биргаликда даволаш ишлари олиб борилиб, сақлаб қолган эдик. Ушбу ҳолат тўғрисида суриштирув ишлари ички ишлар ходимлари томонидан олиб борилади», — дея қўшимча қилади у.
Тошкент шаҳар ички ишлар бош бошқармаси экополиция сафдор ходими Достон Ураловнинг айтишича, улар келгунига қадар дарахтлар тагига бетон тўккан усталар ички ишлар бўлимига олиб кетилган.
«Келганимизда фуқаролар тўпланиб, бу ерда жанжал бўлаётган экан. Ҳолатга ойдинлик киритиш мақсадида фуқаролар билан гаплашсак тадбиркор келиб, дарахтлар остига бетон тўкиб кетибди. Шундан сўнг Ободонлаштириш бошқармаси ходимларини чақиртирдик. Улар келиб, дарахтларнинг тагини тозалашаётганда тадбиркорнинг укаси келиб, жанжал кўтармоқчи бўлди. Улар ҳам ички ишлар бўлимига олиб борилди», — дейди у.
Изоҳ (0)