Шимолий Корея 30 январь куни Hwasong-12 баллистик ракетасини учирганини тасдиқлади. Бу ҳақда Корея марказий телеграф агентлигига таяниб, Жанубий Кореянинг Yonhap агентлиги хабар берди.
Учиришдан мақсад «ишлаб чиқарилган снарядга баҳо бериш» эди. Натижада ракетанинг «аниқлиги, хавфсизлиги ва самарадорлиги» тасдиқланди, дея қайд этган Марказий телеграф агентлиги.
Шимолий Корея Япон денгизи томон номаълум снарядни учиргани ҳақида 30 январь куни Япония ва Жанубий Корея ҳарбийлари хабар берган эди. Бу КХДРнинг йил бошидан бери еттинчи марта ракета учириши. Ҳар икки давлатда снаряд баллистик ракета экани тахмин қилинган.
Япония ҳукумати матбуот котиби Хирокадзу Мацунонинг айтишича, ракета тахминан 800 километр учган, парвознинг максимал баландлиги эса 2 минг километр атрофида бўлган. Жанубий Корея ҳарбийларига кўра, ракетанинг тезлиги товуш тезлигидан 16 баравар юқори бўлган. Ҳарбийлар аввалроқ ракета КХДР 2017 йилда синовдан ўтказган Hwasong-12 га ўхшашини таъкидлаган эди. Учириш Чагандо провинцияси ҳудудидан амалга оширилгани айтилмоқда.
Ушбу воқеадан сўнг Япония ва Жанубий Корея миллий хавфсизлик кенгашлари йиғилиш ўтказди, унга Жанубий Корея президенти Мун Чже Ин раислик қилди.
Япония ҳукумати КХДРга норозилик билдирди. Мацуно республиканинг хатти-ҳаракатлари БМТ Хавфсизлик Кенгаши резолюцияларига зид эканини ва мамлакат, минтақа ва халқаро ҳамжамият хавфсизлигига таҳдид солаётганини айтди.
Жанубий Корея Пхеньян ядро қуроли ва қитъалараро баллистик ракета синовларига қўйилган мораторийсини бекор қилишга яқинлашаётганидан хавотир билдирди.
Пентагон матбуот котиби Жон Кирби эса ракета учирилишидан сўнг АҚШ Шимолий Корея билан музокараларга тайёрлигини ва Корея яриморолини ядросизлантиришга содиқлигини эълон қилди.
Hwasong 12 — ўрта масофага учувчи баллистик ракета. КХДР илк бор 2017 йилнинг май ойида бундай турдаги ракетани синовдан ўтказган эди. Ўшанда ракетанинг учиш масофаси 787 километр, баландлиги 2 минг километрдан ортиқ бўлган.
Изоҳ (0)