Вакцинациядан кейин коронавируснинг омикрон штаммига чалинган беморларда COVID-19 нинг келажакдаги турларига қарши «супериммунитет» ҳосил бўлиши мумкин. Бу каби маълумотлар Орегон саломатлик ва илм-фан университети олимлари томонидан эълон қилинди, деб хабар беради Business Insider.
Таъкидланишича, «супериммунитет» фақат вакцина асосида ишлайди, чунки касалликдан кейинги табиий ҳимоя вирусдан «оддий» ҳимояни таъминлай олади холос.
Олимларнинг аниқлашича, дельта штамм вақтида касалликдан тузалган эмланган фуқаролар Pfizer дори воситасининг иккинчи дозасини олгандан кўра самаралироқ ҳимояга эга бўлган.
«Нафақат антитаналар даражаси, балки турли хил вариантларни ўзаро нейтраллаш имконияти ҳам муҳим», — дейди тадқиқот ҳаммуаллифларидан бири Фикаду Тафессе.
Унинг сўзларига кўра, тўлиқ эмланган фуқаронинг касалликка чалинишида организм коронавируснинг ўзгарувчанлиги ҳақида маълумотга эга бўлади ва «антитаналар тўпламининг қўшимча мураккаблик даражасини яратади».
Аввалроқ Кембриж университети олимлари бошқа ҳимоя чораларисиз атиги икки метрлик ижтимоий масофага риоя қилган ҳолда COVID-19 инфекциясидан ҳимояланиш самарадорлигини таҳлил қилганди. Тадқиқот шуни кўрсатадики, агар одам масофа сақласа-ю, аммо ниқоб тақмаса, барибир коронавирусдан ҳимояланмайди. Олимлар йўталаётган одамнинг оғзидан учиб чиқадиган томчилар унинг атрофида қандай тарқалишини ўрганган. Маълум бўлишича, агар одам ниқоб тақмаган бўлса, бу томчилар, айниқса улар жуда майда бўлса, икки метрдан узоқроққа учиб кетиши мумкин.
Изоҳ (0)