Bir yil avval, aniqrog‘i 2021-yil 20-yanvarda AQShning 46-prezidenti Jo Baydenning inauguratsiya marosimi bo‘lib o‘tgandi. “RBK” uning AQSh prezidentligidagi birinchi yili qanday o‘tgani haqidagi fotosuratlar to‘plamini taqdim etdi.
Jo Baydenning prezidentlik qasamyodini qabul qilish marosimi 2021-yil 20-yanvarda koronavirus pandemiyasi tufayli an’anaviy ommaviy tadbirlarsiz o‘tkazilgan. Marosim boshlanishidan avval AQSh madhiyasini Ledi Gaga ijro qilgandi.
Mavzuga doir:
Baydenning inauguratsiyasidan avval 6-yanvarda sobiq prezidenti Donald Tramp tarafdorlari Kapitoliyga hujum uyushtirgandi. Shturm oqibatida bir necha kishi halok bo‘lgan, keyinchalik mazkur to‘polonlarda ishtirok etganlarning aksariyati qamoq jazosiga hukm qilingandi.
19-martda Bayden Atlantaga uchishdan oldin samolyot trapidan chiqishda bir necha marta qoqildi va yiqilishiga oz qoldi. Oq uy mazkur holatga izoh berib, o‘sha vaqtda kuchli shamol kuzatilganini bildirdi. Ushbu epizodni sobiq prezident Donald Tramp ham e’tibordan qochirmadi: “Jo Baydenning trapga chiqayotgan videosini ko‘rdim va o‘zimga o‘zim shunday dedim: ‘Men unga yutqazmaganman!’”
5-aprelda Jo Bayden rafiqasi Jill xonim bilan Pasxa bayrami tabrigini rezidensiya balkonidan turib yo‘llashdi.
30-aprelda Bayden Amtrak yo‘lovchi tashuvchi temir yo‘l kompaniyasining 50 yilligi munosabati bilan Filadelfiyada o‘tgan tadbirda ishtirok etdi.
27-mayda AQSh prezidenti Klivlendga bordi va u yerda iqtisodiyot haqida nutq so‘zladi.
11 – 13-iyun kunlari Buyuk Britaniyada o‘tgan “Katta yettilik” (G7) sammitida davlat rahbarlari koronavirusga qarshi vaksinalarni qashshoq mamlakatlarga yetkazib berish va uglerod chiqindilarini qisqartirish borasida kelishib oldi.
Jo Bayden va AQSh birinchi xonimi Jill Bayden yozda Yevropa bo‘ylab sayohat qilishdi. Baydenlarni Vindzor saroyida Buyuk Britaniya qirolichasi yelizaveta II qabul qildi.
16-iyunda Jo Bayden hamda Vladimir Putin Jenevada uchrashuv o‘tkazishdi. Jo Bayden uchun bu Rossiya davlat rahbari bilan AQSh prezidenti sifatidagi birinchi uchrashuv bo‘ldi.
Mavzuga doir: “Yuzma-yuz uchrashuvlar har doim foydali”. Bayden va Putinning Jenevadagi to‘rt soatlik uchrashuvi — suratlarda
Angela Merkelning AQShga qilgan tashrifi vaqtida Germaniya kansleri hamda AQSh prezidenti demokratiyani himoya qilishga kelishib olishdi.
Jo Bayden 20-iyulda Oq uyda Superboul-2021’da qatnashgan Amerika futboli bo‘yicha “Tampa-Bey” jamoasi a’zolari bilan uchrashdi.
26-avgustda Bayden Oq uyda matbuot bilan muloqot qilib, Afg‘onistondagi vaziyat haqida bayonot qildi.
AQSh prezidenti amerikalik harbiylarning Afg‘oniston hududidan chiqib ketishi haqida aprelda e’lon qilgandi. Shundan keyin “Tolibon” harakati jangarilari faol hujumlarni boshladi va 15-avgustga borib mamlakat toliblar tomonidan egallab olindi. Ammo avgust oyida Bayden o‘zining AQSh qo‘shinini Afg‘onistondan olib chiqib ketish haqidagi qarori to‘g‘ri ekanligi haqida gapirgan.
Sentabr boshida AQSh prezidenti “Ida” to‘fonidan talafot ko‘rgan mamlakat hududlari bo‘ylab safarlarni amalga oshirdi.
Mavzuga doir:
27-sentabrda Jo Bayden koronavirusga qarshi Pfizer vaksinasining uchinchi busterini qabul qildi va emlanish taqiqlanmagan hammani vaksinatsiya qilinishga chaqirdi.
Jo Bayden prezidentligining birinchi yilida agar sog‘lig‘i bilan muammolar bo‘lmasa, ikkinchi bor prezidentlikka saylanish uchun harakat qilib ko‘rmoqchi ekanligi haqida bir necha marta gapirgan. Bayden saylovlarda g‘alaba qozonganidan keyin AQShda prezidentlikka saylangan eng qariya davlat rahbariga aylangan — u 79 yoshda prezidentlik kursisini egallagandi.
Jo Bayden prezidentlikka saylanganidan bir yil o‘tib, Gallup so‘rovnomasiga ko‘ra uning reytingi 57 dan 43 foizga tushib ketgan. Biroq u hali ham o‘zidan avvalgi hamkasbi Donald Trampdan ommaboproq va ikkinchi bor prezidentlik saylovlarida qatnashishga tayyorligini bildirgan.
Izoh (0)