Бир йил аввал, аниқроғи 2021 йил 20 январда АҚШнинг 46-президенти Жо Байденнинг инаугурация маросими бўлиб ўтганди. «РБК» унинг АҚШ президентлигидаги биринчи йили қандай ўтгани ҳақидаги фотосуратлар тўпламини тақдим этди.
Жо Байденнинг президентлик қасамёдини қабул қилиш маросими 2021 йил 20 январда коронавирус пандемияси туфайли анъанавий оммавий тадбирларсиз ўтказилган. Маросим бошланишидан аввал АҚШ мадҳиясини Леди Гага ижро қилганди.
Мавзуга доир:
Байденнинг инаугурациясидан аввал 6 январда собиқ президенти Дональд Трамп тарафдорлари Капитолийга ҳужум уюштирганди. Штурм оқибатида бир неча киши ҳалок бўлган, кейинчалик мазкур тўполонларда иштирок этганларнинг аксарияти қамоқ жазосига ҳукм қилинганди.
19 мартда Байден Атлантага учишдан олдин самолёт трапидан чиқишда бир неча марта қоқилди ва йиқилишига оз қолди. Оқ уй мазкур ҳолатга изоҳ бериб, ўша вақтда кучли шамол кузатилганини билдирди. Ушбу эпизодни собиқ президент Дональд Трамп ҳам эътибордан қочирмади: «Жо Байденнинг трапга чиқаётган видеосини кўрдим ва ўзимга ўзим шундай дедим: ‘Мен унга ютқазмаганман!’»
5 апрелда Жо Байден рафиқаси Жилл хоним билан Пасха байрами табригини резиденция балконидан туриб йўллашди.
30 апрелда Байден Амтрак йўловчи ташувчи темир йўл компаниясининг 50 йиллиги муносабати билан Филаделфияда ўтган тадбирда иштирок этди.
27 майда АҚШ президенти Кливлендга борди ва у ерда иқтисодиёт ҳақида нутқ сўзлади.
11 – 13 июнь кунлари Буюк Британияда ўтган «Катта еттилик» (G7) саммитида давлат раҳбарлари коронавирусга қарши вакциналарни қашшоқ мамлакатларга етказиб бериш ва углерод чиқиндиларини қисқартириш борасида келишиб олди.
Жо Байден ва АҚШ биринчи хоними Жилл Байден ёзда Европа бўйлаб саёҳат қилишди. Байденларни Виндзор саройида Буюк Британия қироличаси елизавета II қабул қилди.
16 июнда Жо Байден ҳамда Владимир Путин Женевада учрашув ўтказишди. Жо Байден учун бу Россия давлат раҳбари билан АҚШ президенти сифатидаги биринчи учрашув бўлди.
Мавзуга доир: «Юзма-юз учрашувлар ҳар доим фойдали». Байден ва Путиннинг Женевадаги тўрт соатлик учрашуви — суратларда
Ангела Меркелнинг АҚШга қилган ташрифи вақтида Германия канцлери ҳамда АҚШ президенти демократияни ҳимоя қилишга келишиб олишди.
Жо Байден 20 июлда Оқ уйда Супербоул-2021’да қатнашган Америка футболи бўйича «Тампа-Бей» жамоаси аъзолари билан учрашди.
26 августда Байден Оқ уйда матбуот билан мулоқот қилиб, Афғонистондаги вазият ҳақида баёнот қилди.
АҚШ президенти америкалик ҳарбийларнинг Афғонистон ҳудудидан чиқиб кетиши ҳақида апрелда эълон қилганди. Шундан кейин «Толибон» ҳаракати жангарилари фаол ҳужумларни бошлади ва 15 августга бориб мамлакат толиблар томонидан эгаллаб олинди. Аммо август ойида Байден ўзининг АҚШ қўшинини Афғонистондан олиб чиқиб кетиш ҳақидаги қарори тўғри эканлиги ҳақида гапирган.
Сентябрь бошида АҚШ президенти «Ида» тўфонидан талафот кўрган мамлакат ҳудудлари бўйлаб сафарларни амалга оширди.
Мавзуга доир:
27 сентябрда Жо Байден коронавирусга қарши Pfizer вакцинасининг учинчи бустерини қабул қилди ва эмланиш тақиқланмаган ҳаммани вакцинация қилинишга чақирди.
Жо Байден президентлигининг биринчи йилида агар соғлиғи билан муаммолар бўлмаса, иккинчи бор президентликка сайланиш учун ҳаракат қилиб кўрмоқчи эканлиги ҳақида бир неча марта гапирган. Байден сайловларда ғалаба қозонганидан кейин АҚШда президентликка сайланган энг қария давлат раҳбарига айланган — у 79 ёшда президентлик курсисини эгаллаганди.
Жо Байден президентликка сайланганидан бир йил ўтиб, Gallup сўровномасига кўра унинг рейтинги 57 дан 43 фоизга тушиб кетган. Бироқ у ҳали ҳам ўзидан аввалги ҳамкасби Дональд Трампдан оммабопроқ ва иккинчи бор президентлик сайловларида қатнашишга тайёрлигини билдирган.
Изоҳ (0)