AQShni ostin-ustun qilgan “Ida” to‘foni. Fotoreportaj

29-avgust kuni Meksika ko‘rfazi sohiliga “Ida” bo‘roni kirib keldi. Dastlab, shamol tezligi soatiga 240 kilometrga yetgan, bo‘ron xavflilik darajasi bo‘yicha beshta toifaning to‘rtinchisi. Tabiiy ofat tufayli AQShning Luiziana shtatida 1 milliondan ortiq aholi elektr energiyasidan uzilib qoldi, bir kishi vafot etdi, Missisipi daryosining yo‘nalishi teskari tomonga burildi. Bo‘rondan keyin Luiziana shtati qanday ko‘rinishga kelgani haqida “RBK” fotoreportaj tayyorladi.

“Ida” — Amerika tarixidagi eng kuchli beshinchi bo‘ron. AQSh prezidenti Jo Bayden falokat oqibatlari ayanchli bo‘lishi va u insonlar hayotiga xavf tug‘dirishi haqida oldindan ogohlantirgan. Atlantika okeanida vujudga kelgan “Ida” bo‘roni Amerikaning Luiziana shtati sohillariga yetib kelgan. Shtatning eng gavjum shahri Nyu-Orlean butunlay elektrsiz qoldi. Entergy energetika kompaniyasining ma’lum qilishicha, uzilish elektr uzatish liniyalarining “qattiq shikastlanishi” bilan bog‘liq.

Politsiya dovulning birinchi qurboni haqida xabar berdi — bir odamning ustiga daraxt qulab tushgan. Shtat bo‘ylab suv toshqini va vayronagarchilik qayd etilgan; shamol tufayli qulagan daraxtlar ko‘plab avtomobil yo‘llarini to‘sib qo‘ygan.

Elektr energiyasi muammosi tufayli shifoxonalar zaxira generatorlari quvvatidan foydalanishga majbur bo‘lmoqda. Mahalliy meteorologiya xizmati aholini uyda qolishga va zaruratsiz ko‘chaga chiqmaslikka chaqirdi.

“Biz oldin ham suv toshqinlaridan aziyat chekardik. Bo‘ronlardan o‘tishga majbur bo‘lganmiz. Lekin umrimda bunday suvni ko‘rmaganman. Bo‘ron shunchalik kuchli bo‘ldiki, hamma joyni butunlay vayron qildi, bizga o‘ta yomon zarba berdi”, — dedi Nyu-Orlean janubidagi Jin Lafitt shahri meri Tim Karner CNN’ga.

Ajablanarlisi shundaki, bundan 16 yil oldin xuddi shu kunda Luiziana shtatiga Katrina dovuli kirib kelgan edi. “Ida” bo‘roni Katrina birinchi marta zarba bergan joydan 72 kilometr uzoqlikda boshlandi. “Ida” 2005-yildan buyon kuzatilgan eng kuchli dovul. Katrina tufayli 1,8 mingdan ortiq odam vafot etgandi. Hozirda dovul pasaygan bo‘lsa-da, meteorologlar yaqin kunlarda Luiziana shtatida kuchli yomg‘ir yog‘ishi mumkinligini hamda suv toshqini xavfi davom etishi haqida ogohlantirmoqda.

Bo‘rondan so‘ng ko‘plab vayronagarchiliklar qayd etilgan, biroq zararning umumiy miqdori hozircha noma’lum. Mahalliy hukumat ma’lum qilishicha, “Ida” dovuli o‘ta tez kuchaygani sababli hukumat 390 ming kishini umumiy evakuatsiya qilishga ulgurmagan.

Nyu-Orlean meri aholini o‘zini-o‘zi evakuatsiya qilishga yoki elektr ta’minotidagi uzilishlarga tayyor turishga chaqirdi. Dovul shtatning ikkita yirik shahri — Nyu-Orlean va Baton-Ruj ustiga yog‘ildi.