Jo Bayden AQShning 46-prezidenti bo‘ldi. U inauguratsiya marosimida qasamyod qabul qilganidan so‘ng rasman ish boshladi. Bu haqda Meduza xabar qilmoqda.

“Men, Jozef Robinet Bayden, tantanali ravishda Amerika Qo‘shma Shtatlari prezidenti vazifalarini sidqidildan bajarishga va Amerika Qo‘shma Shtatlari Konstitutsiyasini qo‘limdan kelganicha saqlashga va himoya qilishga qasamyod qilaman. Va Xudo menga yordam beradi” – dedi AQShning 46-prezidenti Jo Bayden.

Baydendan bir necha daqiqa avval vitse-prezident Kamala Xarris ham qasamyod qildi.

AQShning 45-prezidenti Donald Tramp yangi davlat rahbarining inauguratsiya marosimida ishtirok etishdan bosh tortdi. Bu 150 yil ichida birinchi marta shunday holat bo‘lishi. Marosimga uning ma’muriyati vitse-prezidenti Mayk Pens keldi.

Inauguratsiya marosimi tomoshabinlarsiz o‘tkazildi – faqat rasmiylar va ularning cheklangan miqdordagi mehmonlari ishtirok etdi. Ushbu qaror koronavirus hamda FQB ma’lumotlariga ko‘ra Tramp tarafdorlari tomonidan uyushtirilishi mumkin bo‘lgan tartibsizliklar ehtimoli tufayli qabul qilingan.

Avvalroq Bayden inauguratsiyadan so‘ng darhol AQShni JSST a’zoligiga qaytarishga va Meksika bilan chegarada devor qurilishini to‘xtatishga va’da bergani hamda Donald Tramp Oq uyni tark etgani haqida xabar berilgandi.