29-avgust kuni AQShning bir qancha shtatlariga yopirilgan “Ida” dovuli tufayli Missisipi daryosining yo‘nalishi o‘zgardi. Bu haqda Quyi Missisipi va ko‘rfazdagi suv resurslarini o‘rganish markazining yetakchi gidrologi Skott Perrienga tayanib, CNN telekanali xabar berdi. Markaz AQSh Geologiya xizmatining tarkibiy bo‘linmasi hisoblanadi.

Foto: Getty Images

“Bu vaqt mobaynida daryo oqimi sekundiga 2 futdan (taxminan 60 sm/s) yarim futgacha (15 sm/s) sekinlik bilan boshqa yo‘nalishga o‘zgardi”, — dedi Perrien.

U bu hodisani “o‘ta g‘ayrioddiy” deb atadi. Oqim yo‘nalishidagi o‘zgarish maxsus datchik yordamida qayd etilgan. Perrien ta’kidlashicha, gap birinchi navbatda daryoning yuqori qatlamlari haqida bormoqda, chunki qurilma butun daryo bo‘yicha ma’lumotlarni yozmaydi, chuqurlikdagi qismlarda oqim o‘zgarmagan bo‘lishi mumkin.

Gidrologning so‘zlariga ko‘ra, bo‘ron turli joylarda daryo sathini taxminan 1,5 fut (45 sm)dan yetti futgacha (taxminan 2,1 m) ko‘targan.

29-avgust kuni AQShning Meksika ko‘rfazi sohiliga “Ida” bo‘roni kirib keldi. Natijada, 30-avgust holatiga ko‘ra, Luiziana shtatidagi 869,2 mingdan ortiq aholi elektrsiz qolmoqda. Shtatda joylashgan Nyu-Orlean shahri butunlay elektrdan uzilgan. Shu bilan birga, mahalliy elektr tarmoqlari operatori vakillarining ogohlantirishicha, suv toshqini va elektr uzatish liniyalarining uzilishi oqibatida mintaqa aholisi bir necha hafta elektrsiz qolishi mumkin. Nyu-Orleanda 400 mingga yaqin aholi istiqomat qiladi. Ularning aksariyat qismi allaqachon evakuatsiya qilingan. Rasmiylar ushbu aholi punktining bir qator hududlarida kuchli suv toshqini bo‘lishi mumkinligi haqida ogohlantirgan — suv 2,7 metrgacha ko‘tarilishi mumkin.

Luiziana va Missisipi shtatlarida hukumat favqulodda holat e’lon qildi. Luiziana gubernatori Bel Edvards “Ida”ni 1850-yildan buyon shtat tarixidagi eng kuchli bo‘ron deb atadi. Bo‘ron paytida shamolning maksimal tezligi 150 m/s (240 km/soat) bo‘lgan.

“Ida” xavflilik darajasi bo‘yicha beshta toifadan to‘rtinchisi deb tasniflanadi. Bo‘ron beshinchi toifaga ko‘tarilishi mumkin.

Asenshen okrugi sherifining idorasi “Ida” bo‘ronining birinchi qurboni haqida xabar berdi. Xabarga ko‘ra, politsiya kuchli shamol tufayli mahalliy aholidan birining uyiga daraxt qulab tushgani haqida murojaat olgan. Voqea joyiga yetib kelgan politsiya xodimlarining ma’lum qilishicha, u yerda noma’lum shaxs vafot etgan.

AQSh prezidenti Jo Bayden “Ida” dovuli tufayli Luiziana shtatini tabiiy ofat hududi deb e’lon qildi. “Prezident Jo Bayden Luiziana shtatida katta tabiiy ofat sodir bo‘lganini e’lon qildi hamda “Ida” bo‘ronidan zarar ko‘rgan hududlarda shtat va mahalliy tiklash ishlariga ko‘maklashish uchun federal yordam ko‘rsatishni buyurdi”, — deyiladi Oq uy xabarida.

Federal yordam fuqarolarni tabiiy ofatlardan qutqarishda yordam berish dasturlarini, shu jumladan, vaqtinchalik uy-joy uchun va uylarni ta’mirlash uchun grantlarni o‘z ichiga oladi.