Судан бош вазири мамлакатдаги инқироз фонида истеъфога чиқишини эълон қилди

Судан бош вазири Абдулла Хамдок ўз лавозимини тарк этишини маълум қилди. Бу ҳақда «РИА Новости» хабар берди.

«Бош вазирликдан истеъфога чиқаётганимни эълон қиламан, бу жойни ватаннинг бошқа ўғил-қизлари ихтиёрига қолдиряпман. Улар муқаддас ватанини бошқаришда, у билан ўтиш даврининг қолган муддатини ўтказишда фуқаролик, демократик давлат йўналишидан юришни давом эттирсин», — деди бош вазир мамлакат давлат телевидениеси орқали эфирга узатилган мурожаатида.

Хамдокнинг сўзларига кўра, икки йилдан ортиқ вақт давомида оғир шароитларда ҳукуматни бошқаргани унинг учун шараф бўлган. «Бу вақт ичида Вазирлар Маҳкамаси Суданни халқаро изоляциядан олиб чиқишга муваффақ бўлди», — дея таъкидлаган у.

Судан бош вазири ўз фаолияти давомида «мамлакатни фалокатга учрашидан қутқаришга ҳаракат қилганини» айтди. Шунингдек, Абдулла Хамдок Судандаги сиёсий партиялар ўртасидаги мулоқот «фуқаролик ва демократик давлатга ўтиш» учун ечим эканини қўшимча қилди.

Судан ҳарбийлари 2021 йил 25 октябрь куни бош вазир Абдулла Хамдок ва ҳукуматнинг яна бир қанча аъзоларини ҳибсга олганди. Судан ўтиш даври суверен кенгаши раҳбари Абдул Фаттоҳ ал-Бурхон халққа телемурожаат йўллаб фавқулодда ҳолат эълон қилиниши ва мамлакат ҳукумати тарқатиб юборилиши ҳақида маълум қилди. 26 октябрь куни Хамдок ва унинг рафиқасига ҳибсдан уйига қайтишга рухсат берилди.

Ноябрь ойи охирида Судан ҳарбийлари ва Хамдок ҳокимиятдан ағдарилган бош вазирнинг ўз лавозимига қайтишига ва технократик ҳукумат тузишга келишиб олди.