O‘zbekistonning rasmiy zaxira aktivlari 1-dekabr holatiga ko‘ra, 34,75 milliard dollarni tashkil etmoqda. Bu haqda Markaziy bank ma’lumotlariga tayanib, Spot xabar berdi. Taqqoslash uchun noyabr oyidan beri ular 460 million dollardan ortiqqa kamaygan.
Xususan, bir oy ichida zaxiradagi oltin qiymati 1,2 milliard dollarga tushib ketgan — hozirda oltin zaxirasi 20,44 milliard dollarga baholanmoqda. 20-dekabr holati bo‘yicha bir unsiya oltin qariyb 1800 dollarni tashkil etyapti.
Shuningdek, oltin zaxirasining tonnasi ham kamaygan, bu qimmatbaho metallni xorijga sotish qayta tiklanganini ko‘rsatadi — bunga qadar Markaziy bank oltinni faqat may—iyun oylarida sotgandi. 1-dekabr holatiga ko‘ra, O‘zbekistonda 354,58 tonna oltin mavjud. Bu bir oy oldingi ko‘rsatkichdan 22 tonnaga kam demak.
Shu bilan birga, zaxiradagi xorij valyutalari hajmi 788 million dollarga oshgan — buning hisobiga zaxiraning qisqarishini qisman kompensatsiya qilishga erishilgan. Mavjud xorijiy valyuta miqdori 13,19 milliard dollarni tashkil etmoqda.
Hozirgi zaxiralar 20 oydan ortiq vaqt davomida importni moliyalashtirishga yetadi. Bu rivojlanayotgan mamlakatlar uchun xalqaro tashkilotlar tomonidan tavsiya etilgan 3 oylik darajadan ancha yuqori.
Eslatib o‘tamiz, O‘zbekistonning oltin-valyuta zaxiralari ilk bor 2021-yilning iyunida 35 milliard dollardan oshgandi.
Izoh (0)