Andijonda 500 mingga yaqin aholi qandli diabet, yurak-qon tomir, kamqonlik va bo‘g‘im kasalliklari bilan og‘rishi ma’lum qilindi

Andijonda 485 ming nafar aholi qandli diabet, yurak-qon tomir, kamqonlik va bo‘g‘im kasalliklari bilan og‘riydi. Bu haqda viloyat hokimi Shuhrat Abdurahmonov viloyat xalqiga qilgan murojaatida ma’lum qildi, deya xabar berdi “Daryo” muxbiri.

Ta’kidlanishicha, sog‘liqni saqlash tizimida qilinayotgan amaliy ishlar bilan bir qatorda, aholining haqli e’tirozlariga sabab bo‘layotgan masalalar, jumladan, patronaj xizmati, kadrlar tanqisligi, tibbiyot muassasalarining zamonaviy tibbiy anjomlar bilan ta’minlanganlik darajasi kabi muammolar mavjud. Viloyat hokimining ma’lum qilishicha, shu kabi kamchiliklarni bartaraf etish, fuqarolarning sog‘lig‘ini muhofaza qilish, aholi orasida tibbiy xizmatdan rozi yoki noroziligini bilish maqsadida so‘rovnoma o‘tkazilgan.

“1 million 600 mingta so‘rovnomani chiqarib aholiga tarqatdik. So‘rovnoma haqiqatan tibbiyot sohasida qilishimiz zarur bo‘lgan ishlarimiz ko‘pligini ko‘rsatdi. Sababi, tahlil yakunlarida so‘rovnomada qatnashganlarning 74 foizi (744,5 ming nafar) ko‘rsatilayotgan tibbiy xizmatni qoniqarli baholagan bo‘lsa, lekin 26 foizi (269,5 ming nafar) qisman va umuman tibbiy xizmatdan noroziligini bildirgan. Respondentlarning 80 foizi oila shifokori va patronaj hamshiralarning ishini ijobiy baholagan bo‘lsa, 20 foizi ularning ishidan noroziligini aytgan. Shuningdek, aholi o‘rtasida yurak-qon tomir (134 ming), qandli diabet (60 ming), kamqonlik (224 ming) va bo‘g‘im (67 ming) kabi kasalliklar ko‘p tarqalgani ma’lum bo‘ldi.

So‘rovnomada 60 ming nafar yoki 5,4 foiz aholi qandli diabet kasalligi bilan og‘rib turishini aytib o‘tgan. Vaholanki, hozirda endokrinologiya dispanseri nazoratida 1 foiz aholi turishi ko‘rsatilgan. Buning sababi birlamchi tizimda endokrin kasalliklarni aniqlash va uni nazoratga olish yetarli emasligini ko‘rsatadi.

Qandli diabetdan aziyat chekayotgan aholi tumanlar kesimida tahlil qilinganda Andijon tumanida 9,1 foiz, Xonobod shahrida 7,7 foiz, Oltinko‘l va Paxtaobod tumanlarida 7,3 foizni tashkil etgan. Bu juda achinarli holat”, — deydi Shuhrat Abdurahmonov.

Ma’lum qilinishicha, 2022-yilda birlamchi tibbiyot muassasalarida 85 ta alohida hamshiralik qabul punktlari, 100 ta xususiy tibbiyot muassasasi, Baliqchi, Shaxrixon, Qo‘rg‘ontepa va Paxtaobod tumanlarida 4 ta tumanlararo perinatal markazlar, shuningdek, Bo‘ston tumanida tumanlararo jarrohlik travmatologiya markazi tashkil etish mo‘ljallangan.

Bundan tashqari, mahalliy budjet hisobidan Endokrinologiya dispanseriga bemorlarning dori-darmon xarajatlari uchun qo‘shimcha 2,5 milliard so‘m mablag‘ ajratib, bemorlarni 100 foiz bepul dori-darmon, aholining xavfli guruhiga mansub 1 millionga yaqin homilador ayollar va 14 yoshgacha bo‘lgan bolalarni 2022-yil 1-yarim yilligida 750 million so‘mlik yod preparatlari bilan bepul ta’minlash rejalashtirilgan.