O‘zbekiston tashqi aktivlarining qiymati oltin narxining pasayishi hisobiga qisqardi. Bu haqda Markaziy bankning O‘zbekiston to‘lov balansi, xalqaro investitsion pozitsiyasi va tashqi qarzi bo‘yicha e’lon qilingan 2021-yil I yarim yillik hisobotida so‘z boradi.

Foto: Bloomberg

2021-yilning I yarim yilligi yakuniga ko‘ra davlat boshqaruvi sektorining jami aktivlari 2 foizga yoki 755,3 million dollarga qisqarib, 34,2 milliard dollarni tashkil etgan. Ushbu qisqarish, asosan, valyuta zaxiralaridagi valyuta va depozitlar qoldig‘i 766,1 million dollarga kamayishi bilan bog‘liq.

“2021-yil boshidan xalqaro moliya bozorlarida oltinning bir troya unsiyasi 1957,2 dollardan 1757,8 dollargacha tushishi, davlat boshqaruv sektorining investitsion pozitsiyasiga salbiy ta’sir ko‘rsatdi”, — deyiladi hisobotda.

Ma’lumot uchun, davlat boshqaruvi sektorining majburiyatlari davlatning tashqi qarzidan iborat. Bunda portfel investitsiyalari bo‘yicha Moliya vazirligi tomonidan xalqaro moliya bozorida joylashtirilgan yevroobligatsiyalar narxlarining yil boshiga nisbatan 68,2 million dollarga pasayishi kuzatilgan bo‘lsa, kreditlar va qarzlar bo‘yicha norezidentlar oldidagi majburiyatlar yangi qarzdorliklarning jalb qilinishi natijasida 315,1 million dollarga ortgan. Natijada davlat boshqaruvi sektorining jami majburiyatlari hisobot davrida 1 foizga yoki 243,2 million dollarga o‘sib, 1-iyul holatiga ko‘ra 16,8 milliard dollarni tashkil etgan.

Avvalroq O‘zbekiston oltin-valyuta zaxirasi 1-sentabr holatiga ko‘ra 35,4 milliard dollarni tashkil etgani, bu avgust oyi bilan taqqoslaganda u 320 million dollarga oshgani to‘g‘risida xabar berilgandi.