Majburiy ijro byurosi Toshkent viloyati Toshkent tumanida joylashgan alkogol mahsulotlar ishlab chiqarish zavodi binosini asbob-uskunalari bilan birga auksion savdosiga qo‘ydi. Lot haqidagi ma’lumotlar bilan “E-auksion” saytida tanishish mumkin.
Qayd etilishicha, korxona Toshkent tumanining Qorasaroy qishlog‘i Farovonlik ko‘chasi 14-uyida joylashgan bo‘lib, yer uchastkasining umumiy maydoni qariyb 2,6 gektarni tashkil etadi.
Binoning umumiy maydoni 3847 kvadrat metr bo‘lib, shundan 1929 kvadrat metr qismi foydali hisoblanadi. Zavodda elektr ta’minoti va suv bor, lekin kanalizatsiya va gaz tarmoqlariga ulanmagan.
Obyektning boshlang‘ich bahosi 22 milliard 640 million so‘mni tashkil etadi. Auksionda qatnashish uchun ariza qabul qilishning oxirgi muddati 11-yanvar bo‘lib, auksion savdosi 13-yanvar kuni o‘tkaziladi.
Vino ishlab chiqarish zavodida 76 ta sisterna, Ferrero Ugo e Fabrizio S aroq mahsulotlarini quyish uskunasi, Frilli SRL tipidagi mevadan konyak spirti ishlab chiqarish bo‘yicha xomashyoni ikki usulda haydovchi uskuna, sisternadan vinoni haydovchi moslama, mevani siqish va danagidan ajratish uskunasi, past temperaturada mahsulotni sovutish sisternasidan iborat asbob uskunalar bor bo‘lib, ular ham korxona bilan birgalikda sotiladi.
Izoh (0)