Халқ таълими вазирлиги 20 декабрь куни болалар хавфсизлиги ҳамда турли пул йиғимларининг олдини олиш мақсадида мактабларда Янги йил байрамини нишонлаш билан боғлиқ айрим чекловлар жорий қилинаётганини маълум қилди. Орадан кўп ўтмай вазирлик яна расмий баёнот билан чиқиб, байрамни нишонлаш билан боғлиқ ҳеч қандай чекловлар йўқлигини билдирди.
Таъкидланишича, Халқ таълими вазирлигининг умумтаълим мактабларига Янги йил байрамини режалаштириш ва ўтказиш билан боғлиқ чеклов юзасидан тегишли хати нотўғри талқин қилинган.
«Умумтаълим мактаблари ҳудудида Янги йил байрамини нишонлаш билан боғлиқ ҳеч қандай чекловлар мавжуд эмаслигини билдирамиз. Шу билан бирга, мактабларда пул йиғимлари ҳамда ота-оналарнинг эътирозларининг олдини олиш мақсадида ресторан, кафе ва бошқа умумий овқатланиш шохобчаларида мактаб ўқувчиларига Янги йил байрамини ўтказиш тавсия этилмайди», — дейилади баёнотда.
Эслатиб ўтамиз, декабрь бошида Республика махсус комиссиясининг йиғилишида Ўзбекистонда эпидемиологик вазият барқарорлигини сақлаб қолиш ва мамлакат ҳудудига коронавирус инфекциясининг янги «омикрон» штамми кириб келишига йўл қўймаслик мақсадида бир қатор янги тартиблар белгиланганди. Унга кўра, аҳоли саломатлигини таъминлаш ҳамда Ўзбекистонда эпидемиологик вазият барқарорлигини сақлаш мақсадида фуқароларга янги 2022 йил байрами тадбирларини имкон қадар оила даврасида ўтказиш тавсия этилган.
Изоҳ (0)