Ikki hafta oldin koronavirusning yangi “omikron” shtammi bilan kasallanish holatlari tez ko‘paya boshlagan Janubiy Afrika (JAR)da shifoxonaga yotqizilayotgan bemorlar soni keskin kamayib ketdi. Bu haqda mamlakat sog‘liqni saqlash vaziri Jo Faaxlaga tayanib, Meduza xabar berdi.
Bloomberg’ning yozishicha, yangi to‘lqinning ikkinchi haftasi natijalariga ko‘ra, koronavirusga chalinganlarning faqatgina 1,7 foizi shifoxonaga yotqizilgan. Oldingi to‘lqinlar — “delta” shtammi keng tarqalganida ikki hafta davomida kasallarning 19 foizi shifoxonaga murojaat qilgan.
“Omikron” shtammi “delta”ga qaraganda juda jadallik bilan tarqalmoqda. JARda hozirgi to‘lqinning ikkinchi haftasida har kuni 20 mingdan ortiq odamda kasallik tasdiqlanyapti, “delta”ning bu kabi bosqichida esa ushbu ko‘rsatkich 4,4 mingni tashkil etgan.
JAR hukumatining ma’lum qilishicha, kasallanish holatlari keskin ortayotgani fonida o‘lim holatlari “juda kichik” o‘sishni ko‘rsatmoqda.
Eslatib o‘tamiz, koronavirusning yangi “omikron” shtammi birinchi marta 11-noyabr kuni Janubiy Afrikada aniqlangan. Britaniyalik olimlarning ta’kidlashicha, yangi shtamm tarqalish tezligi tufayli avvalgilariga, jumladan, deltaga qaraganda xavfliroq bo‘lishi mumkin. Jahon sog‘liqni saqlash tashkiloti mavjud vaksinalar ushbu shtammga qarshi samarasiz bo‘lishi mumkin, degan shubhalar tufayli “omikron”ni xavfli deb tan oldi. Tashkilot, shuningdek, ilgari koronavirusni boshdan o‘tkazganlarda “omikron” bilan qayta kasallanish ehtimoli yuqoriligini ma’lum qildi. 15-dekabr holatiga ko‘ra, JSST “omikron” dunyoning 77 mamlakatida aniqlanganini e’lon qilgan.
Izoh (0)