Shimoliy Koreya hukumati mamlakat aholisiga KXDRning sobiq yetakchisi Kim Chen Irning vafotiga 10 yil to‘lishi munosabati bilan e’lon qilingan 11 kunlik motamda kulish, tug‘ilgan kunlarni nishonlash, yaqinlarini dafn etish va ovoz chiqarib yig‘lash taqiqlandi, deb xabar beradi “Korrespondent.net”.
Ta’kidlanishicha, motam davrida mahalliy aholi bo‘sh vaqtlarini o‘tkaza olmaydi, xarid qilish va spirtli ichimliklar ichishi mumkin emas.
Oldingi yillardagi motam kunlarida spirtli ichimlik ichgan fuqarolar hibsga olingan edi. Mahalliy aholining so‘zlariga ko‘ra, bu kabi insonlar mafkurafiy jinoyatchi hisoblangan, ular olib ketilgan va boshqa hech kim ularni ko‘rmagan. Partiya rahbariyati ixtisoslashtirilgan politsiya brigadalarini tashkil etgan.
“Agarda oila a’zongiz motam vaqtida vafot etsa, baland ovoz chiqarib yig‘lashga ruxsat berilmaydi, jasadni esa motam tugaganidan so‘ng olib chiqish kerak bo‘ladi. Odamlarning tug‘ilgan kuni motamga to‘g‘ri kelib qolsa, bayramni nishonlay ham olmaydi”, — deydi mahalliy aholi.
Ma’lumot uchun, Kim Chen Ir otasi Kim Ir Sen 1994-yilda vafot etganidan so‘ng, Shimoliy Koreya rahbariga aylangan va mamlakatni o‘limiga qadar — 2011-yilgacha boshqargan.
Kim Chen Ir davrida Shimoliy Koreyada uning shaxsini ulug‘lash va ilohiylashtirish siyosati olib borilgan. Kim Chen Ir davrida KXDR vaqti-vaqti bilan ommaviy qatl qilish, qullik, majburiy abort qilish, Yaponiya va Janubiy Koreya fuqarolarini o‘g‘irlash va mehnat konslagerlarini barpo etish kabi inson huquqlarini buzishda ayblangan.
Kim Chen Irning o‘limidan so‘ng hokimiyat uning merosxo‘ri — o‘g‘li Kim Chen Inga o‘tgan.
Avvalroq KXDR asoschisi Kim Ir Senning ukasi vafot etgani to‘g‘risida xabar berilgandi.
Izoh (0)