AQSh prezidenti Jo Bayden Eron bilan bog‘liq yadro bitimi vaziyatida diplomatiyaga ustunlik bermoqda. Bu haqda Davlat departamenti vakiliga tayanib, “Kommersant” xabar berdi. Davlat rahbari muzokaralar muvaffaqiyatsiz o‘tsa, “boshqa variantlarni” ko‘rib chiqadi.
“Prezident Bayden Eron yadro quroliga ega bo‘lishiga yo‘l qo‘ymasligini aniq aytdi va shubhasiz, diplomatiyani ustuvor hamda birinchi variant deb hisoblaydi, qolgan variantlar esa bu muvaffaqiyatga erishilmasa, ko‘rib chiqiladi”, — deydi Davlat departamenti vakili Venadagi konsultatsiya natijalari bo‘yicha o‘tkazilgan telefon brifingida.
Vashingtonning hisoblashicha, yadro bitimi borasidagi natijalar “bo‘lishi mumkin bo‘lgan holatdan yaxshi, biroq kutilganidan yomonroq”. Davlat departamenti vakilining ta’kidlashicha, muzokara ishtirokchilari muzokaralarning asosiga aylanishi mumkin bo‘lgan bitim matni bo‘yicha umumiy fikrga kelgan. AQSh yil oxiriga qadar muzokaralarni qayta tiklash niyatida.
AQSh prezidentining milliy xavfsizlik bo‘yicha yordamchisi Jeyk Sallivan oldinroq yadro bitimiga qaytish “o‘zlari xohlaganidan ko‘ra” qiyinroq bo‘lganini aytgandi. “Biz 2018-yildagi bitimdan chiqish borasidagi qarorning tovonini to‘lyapmiz”, — deya qo‘shimcha qilgan.
Sallivan Rossiya bilan hamkorlikni konstruktiv deb atagan. Uning fikricha, diplomatiya Eronga yadroviy qurolni qo‘lga kiritishiga yo‘l qo‘ymaslikning eng yaxshi yo‘li.
Avvalroq Eron yadro dasturi ishtirokchilariga yadroviy majburiyatlar va AQSh sanksiyalarini bekor qilish yuzasidan o‘z takliflarni topshirgani xabar qilingandi. Ta’kidlash kerakki, AQSh ilgari ham agar Eron yadro dasturiga diplomatiya yo‘li bilan qaytmasa, boshqa choralar ko‘rishi mumkinligidan ogohlantirgan edi.
Izoh (0)