Икки ҳафта олдин коронавируснинг янги «омикрон» штамми билан касалланиш ҳолатлари тез кўпая бошлаган Жанубий Африка (ЖАР)да шифохонага ётқизилаётган беморлар сони кескин камайиб кетди. Бу ҳақда мамлакат соғлиқни сақлаш вазири Жо Фаахлага таяниб, Meduza хабар берди.
Bloomberg’нинг ёзишича, янги тўлқиннинг иккинчи ҳафтаси натижаларига кўра, коронавирусга чалинганларнинг фақатгина 1,7 фоизи шифохонага ётқизилган. Олдинги тўлқинлар — «дельта» штамми кенг тарқалганида икки ҳафта давомида касалларнинг 19 фоизи шифохонага мурожаат қилган.
«Омикрон» штамми «дельта»га қараганда жуда жадаллик билан тарқалмоқда. ЖАРда ҳозирги тўлқиннинг иккинчи ҳафтасида ҳар куни 20 мингдан ортиқ одамда касаллик тасдиқланяпти, «дельта»нинг бу каби босқичида эса ушбу кўрсаткич 4,4 мингни ташкил этган.
ЖАР ҳукуматининг маълум қилишича, касалланиш ҳолатлари кескин ортаётгани фонида ўлим ҳолатлари «жуда кичик» ўсишни кўрсатмоқда.
Эслатиб ўтамиз, коронавируснинг янги «омикрон» штамми биринчи марта 11 ноябрь куни Жанубий Африкада аниқланган. Британиялик олимларнинг таъкидлашича, янги штамм тарқалиш тезлиги туфайли аввалгиларига, жумладан, дельтага қараганда хавфлироқ бўлиши мумкин. Жаҳон соғлиқни сақлаш ташкилоти мавжуд вакциналар ушбу штаммга қарши самарасиз бўлиши мумкин, деган шубҳалар туфайли «омикрон»ни хавфли деб тан олди. Ташкилот, шунингдек, илгари коронавирусни бошдан ўтказганларда «омикрон» билан қайта касалланиш эҳтимоли юқорилигини маълум қилди. 15 декабрь ҳолатига кўра, ЖССТ «омикрон» дунёнинг 77 мамлакатида аниқланганини эълон қилган.
Изоҳ (0)