15-dekabr kuni Ashxobodda Turkmaniston prezidenti Gurbanguli Berdimuhamdeovning yangi “Yashasin tinch hayot!” nomli she’riga bag‘ishlangan “Arkadagyň parahatçylyk ýörelgesi – dünýä nusgalyk görelde” (“Arkadag‘ning tinchlik tamoyili — bu butun dunyo uchun model) nomli tantanli konferensiya bo‘lib o‘tdi. Bu haqda “Xronika Turkmenistana” xabar berdi.
Tadbirda madaniyat va san’at sohasi yetakchilari hamda namoyandalari, shoir va nosirlar, ommaviy axborot vositalari xodimlari, yoshlar ishtirok etgan.
Konferensiya avvalida Turkmaniston Bosh drama teatri artistlari davlat rahbarining she’rini o‘qib bergan.
Nashrning yozishicha, she’rda “millat yetakchisi adabiy yondashuv asosida zamonaviy hokimiyat va baxtning zamonaviy davrida neytral maqomning ahamiyati haqida xulosalar chiqaradi”.
Tadbir ishtirokchilarining ta’kidlashicha, “she’rda xalqaro harbiy bloklar va shartnomalarga qo‘shilmaslik chaqirig‘i ta’sirchan va lo‘nda yangraydi”.
Ma’lum bo‘lishicha, prezidentning she’riga musiqa ham bastalangan. “Yashasin tinch hayot!” qo‘shig‘i ham konferensiyada kuylangan. Undan tashqari “Arkadag‘ siz bilan” va “Arkadag‘ rahbar” qo‘shiqlari ham ijro etilgan.
Avvalroq Gurbanguli Berdimuhamedov Betaraflik kuni sharafiga ziyofat uyushtirgani va unda mehmonlarga yangi yozgan she’rini o‘qib bergani to‘g‘rida xabar berilgandi.
Izoh (0)