АҚШ Молия вазирлиги КХДР билан алоқалари сабаб Россиядаги Европа ЮСТО хусусий институти ва унинг ректори Дмитрий Соинга нисбатан санкциялар қўлланганини эълон қилди. Бу ҳақидаги хабар вазирликнинг расмий сайтига жойлаштирилган.
«ЮСТО Европа институти ва жаноб Соин Шимолий Кореядаги қурувчи-ишчиларга юзлаб талабалик визалари берилишига кўмаклашган», дейилади АҚШ Молия вазирлиги баёнотида.
Қайд этилишича, ишчиларнинг бир қисми КХДРдаги оммавий қирғин қуролини ишлаб чиқиш дастурига алоқадор шахслар бўлган. Уларнинг даромадидан қурол дастурини амалга оширишда фойдаланилган бўлиши мумкин, дейилган хабарда.
Шунингдек, АҚШнинг санкциялари рўйхатига Хитой, Мьянма, Бангладеш ва Шимолий Кореядан яна 14 нафар жисмоний шахс ва 9 та ташкилот киритилган. Улар орасида Мьянма ҳамда Бангладешнинг ҳарбий тузилмалари, Хитой компаниялари ва КХДР бош прокуратураси бор. Тақиқлар қўлланилган шахслар ва ташкилотларнинг барчаси инсон ҳуқуқлари соҳасида жиддий камчиликларга йўл қўйганлиги таъкидланган.
«ЮСТО Европа институти 1995 йилда университет сифатида рўйхатдан ўтган ва 2012 йилда институт сифатида қайта ташкил этилган, дейилган муассаса расмий сайтидаги ахборотда. Шунингдек, сайтда ОТМ таъсисчиларидан бири Россия Давлат думаси депутати, 2018 йилдаги президентлик сайловларида номзод сифатида иштирок этган Сергей Бабурин эканлиги ёзилган. Бабуриннинг сайловолди кампаниясида Дмитрий Соин унинг ишончли вакили бўлган. ОТМ сайтида 1993–2007 йилларда Соиннинг Приднестровяда давлат хавфсизлик органларида ишлагани ҳам баён этилган, шунингдек, у 2008 йилда «Единая Россия» партиясидан депутатликка сайланган Валерий Богомоловнинг ёрдамчиси лавозимида фаолият олиб борган.
«ЮСТО Европа институти»да талабалар менежмент, юриспруденсия ва иқтисодиёт йўналишларида таълим олади. Бундан ташқари олийгоҳда ароматерапия ҳамда фитотерапия курслари ўқитиладиган «фаол узоқ яшаш ва адаптив жисмоний тарбия» кафедраси, шунингдек «Инсон онгига таъсир кўрсатиш: ҳимоя ва ҳужум» ҳамда «Имиж — вассалом! Ўзингни четлатишларига йўл қўйма!» ва «астрологияда (мунажжимлик) менежмент ва маркетинг» каби қўшимча курслар мавжуд.
Институт талабалар ва тингловчиларга пандемия сабаб юзага келган иқтисодий инқироз шароитида яхши нархлар таклиф этган. Олий таълимда таҳсил олиш нархи йилига 80 минг рубль (қарийб 1100 АҚШ доллари), қўшимча таълим учун нархлар эса 10 мингдан (136 доллар) 40 минг рублгача (650 доллар) этиб белгиланган.
Аввал АҚШнинг Эрон, Сурия ва Уганда фуқароларига қарши санкциялар жорий этгани, Вашингтоннинг Россияга қарши «тажовузкор» санкциялар пакетини тайёрлаётгани, АҚШ ва Европа Иттифоқи миграция инқирози сабаб Беларусга қарши янги санкциялар қўллагани ҳақида хабарлар берилганди.
Изоҳ (0)