Qirg‘iziston sobiq prezidenti So‘ronboy Jeenbekovning korrupsiyada gumon qilingan ukasi tergov izolyatoridan ozod etildi. Bu haqda Tengrinews xabar berdi.
Bishkekning Pervomayskiy tuman sudi matbuot xizmati xabariga ko‘ra, Yuqori Kengash (parlament) deputati Asilbek Jeenbekovga nisbatan ehtiyot chorasini o‘zgartirish to‘g‘risidagi iltimosnoma Qirg‘iziston Respublikasi Milliy xavfsizlik davlat qo‘mitasi tomonidan kiritilgan.
“Bishkek shahar Pervomayskiy tuman sudining 2021-yil 9-dekabrdagi qarori bilan A.Sh.Jeenbekovga nisbatan ilgari qo‘llangan qamoqqa olish tarzidagi ehtiyot chorasi bekor qilindi va u sud zalida hibsdan ozod etildi”, — deyiladi tuman sudi xabarida.
Yana bir deputat To‘raboy Zulfiqorov ham ozodlikka chiqarilgan.
Eslatib o‘tamiz, siyosatchilar “Qumtor” bo‘yicha jinoiy ish doirasida qo‘lga olingandi.
8-dekabr kuni Qirg‘iziston parlamentida yuqorida qayd etilgan deputatlarni jinoiy javobgarlikka tortishni ma’qullash yuzasidan Qirg‘iziston Respublikasi bosh prokurorining taqdimnomalarini ko‘rib chiqish bo‘yicha maxsus deputatlik komissiyasi ishining yakunlari to‘g‘risida ma’lumotlar o‘qib eshittirildi.
Mazkur komissiya raisi Kanatbek Isayevning ma’lum qilishicha, yetarli va asosli dalillar yo‘qligini hisobga olib, ushbu deputatlar zudlik bilan ozod etilishi va ularni jinoiy javobgarlikka tortish to‘xtatilishi zarur, degan xulosaga kelingan.
Komissiya xulosasini 94 nafar deputat qo‘llab-quvvatlagan, qarshi ovozlar bo‘lmagan.
Sentabr oyida Qirg‘iziston sobiq bosh vaziri Jo‘mart Otorboyev Qirg‘izistonda Qumtor konini qazishda “Qumtor koni bosh rejasining atrof-muhitga ta’sirini baholash jarayonida atrof-muhitni muhofaza qilish davlat agentligi komissiyasiga bosim o‘tkazganlikda” ayblanib hibsga olingandi.
Bundan avval Qirg‘iziston sobiq bosh vazirlari Temir Sariyev va Omurbek Babanov Qumtor ishi bo‘yicha hibsga olingandi. Shuningdek, Qirg‘izistonning birinchi va ikkinchi prezidentlari Asqar Akayev va Qurmanbek Bakiyevlar iyul oyi boshlarida Qumtor ishi bo‘yicha xalqaro qidiruvga berilgan.
Asqar Akayev 2-avgust kuni Qirg‘izistonga qaytdi. U yo‘l qo‘ygan xatolari uchun hamda “Qumtor” loyihasini amalga oshirish chog‘ida umidlarni oqlamagani uchun qirg‘iz xalqidan uzr so‘radi. Qirg‘iziston sobiq prezidenti Qumtor ishi bo‘yicha Milliy xavfsizlik davlat qo‘mitasida so‘roq qilinganidan keyin mamlakatni yana tark etdi.
Izoh (0)