Butun dunyo qamoqxonalarida saqlanayotgan jurnalistlar soni ketma-ket oltinchi yil rekord darajaga yetdi. Jurnalistlarni himoya qilish qo‘mitasi (CPJ) ma’lumotlariga ko‘ra, 1-dekabr holati bo‘yicha ular 293 kishini tashkil etmoqda, deb yozadi “Kommersant”.
Qo‘mitada ta’kidlanishicha, Xitoy jurnalistlar uchun eng katta qamoqxona bo‘lib qolmoqda: mamlakatdagi panjaralar ortida 50 nafar jurnalist bor.
Ikkinchi o‘rinda fevraldagi harbiy to‘ntarishdan keyin bir necha o‘nlab jurnalistlar hibsga olingan Myanma (26 kishi), uchinchi o‘rinda Misr (25), to‘rtinchi o‘rinda Vyetnam (23) turibdi. Yuqori beshlikka Belarus ham kirgan, mamlakat qamoqxonalarida 19 nafar jurnalist bor, mazkur raqamlar qo‘mita bunday ma’lumotlarni yig‘ishni boshlagan 1992-yildan beri Belarus uchun eng yuqori ko‘rsatkichdir.
Rossiya bu ro‘yxatda sakkizinchi o‘rinni egalladi, 14 nafar rossiyalik jurnalist panjara ortida. CPJ ma’lumotlariga ko‘ra, Rossiya “rahbarlari muxolifatni bostirish uchun muntazam ravishda texnologiya va xavfsizlik qonunlaridan foydalanadigan” davlatlar qatoriga kiradi.
Bundan tashqari, kasbiy faoliyati ortidan jurnalistlarning hayotiga qasd qilishlar davom etmoqda. CPJ xabar berishicha, bu yil dunyo bo‘ylab 42 nafar jurnalist halok bo‘lgan, ulardan 24 nafari maqolalari tufayli o‘ldirilgan. Qolganlari noma’lum sharoitlarda vafot etgan va bular kasbiy faoliyat uchun qasddan sodir etilgan qotilliklarmi yoki yo‘qligini aniqlashning iloji bo‘lmagan. Aksariyat jurnalistlar Meksika, Hindiston va Afg‘onistonda halok bo‘lgan.
Izoh (0)