Qirg‘izistonda sobiq bosh vazir Omurbek Babanov “Qumtor” oltin qazib olish loyihasini amalga oshirish jarayonida korrupsiyaga qo‘l urganlikda gumonlanib hibsga olindi. Bu haqda mamlakat Milliy xavfsizlik davlat qo‘mitasiga tayanib, “Interfaks” xabar berdi.

Foto: Sputnik

Bunga qadar 26-yanvar kuni yana bir sobiq bosh vazir Muhammadkaliy Abilgaziyev “Qumtor” bilan bog‘liq jinoiy ish bo‘yicha hibsga olingan edi.

O‘shanda Milliy xavfsizlik qo‘mitasi Abilgaziyevni “Qumtor Gold Company” YoAJ (mamlakatdagi eng yirik oltin koni) ishlab chiqaruvchisiga geologik qidiruv va oltin qazib olish uchun qo‘shimcha hududlarni berish to‘g‘risidagi farmonni imzolash ayblagan. Tergov farmon noqonuniy hamda davlat va fuqarolarning manfaatlariga zid ravishda imzolangan deb hisoblaydi. Abilgaziyev hukumatni 2018-yildan 2020-yil 15-iyungacha boshqargan.

Milliy xavfsizlik davlat qo‘mitasi aniqlik kiritishicha, qo‘mita tergovchilari, Bosh prokuratura va Ichki ishlar vazirligi “Qumtor” konini rivojlantirishning turli bosqichlarida korrupsiya faktlarini tekshirishni davom ettirmoqda. Hozirgacha turli mansabdor shaxslarga nisbatan to‘rtta jinoiy ish qo‘zg‘atilgan, ular tufayli yetkazilgan zarar 10 milliard somdan (946 151 dollar) oshadi.

Bosh prokuratura ma’lumotlariga ko‘ra, 1992-yildan 2019-yilgacha bo‘lgan davrda “Qirg‘izoltin” OAJning ayrim mansabdor shaxslari va rahbariyati Kanadaning Cameco, Centerra Gold Inc. kompaniyalari vakillari bilan “noqonuniy va barqaror aloqa o‘rnatgan”, shuningdek, “Qumtor Operating Company” YoAJ va “Qumtor Gold Company” YoAJ, “noqonuniy ravishda moddiy va boshqa manfaatlarni ko‘zlab ‘Qumtor’ oltin konini rivojlantirish bo‘yicha Qirg‘iziston uchun noqulay bo‘lgan shartnomalar tuzgan.”

“TASS” agentligining xabar berishicha, Qirg‘iziston parlamentining sobiq raisi va sobiq prezident So‘ronbay Jeenbekovning ukasi Asilbek Jeenbekov ham korrupsiyada gumon qilinib hibsga olingan.

Respublika Milliy xavfsizlik davlat qo‘mitasi mahalliy ommaviy axborot vositalarida Jeenbekovning hibsga olingani to‘g‘risida paydo bo‘lgan xabarlarni tasdiqladi.

Asilbek Jeenbekov Sotsial-demokratik partiyasidan Qirg‘iziston yuqori kengashi (parlament) deputati, shuningdek, 2011-yildan 2016-yilgacha qonun chiqaruvchi organ spikeri bo‘lgan. U 2016-yil aprelida akasining nomzodi Qirg‘iziston bosh vaziri lavozimiga  ko‘rsatilganidan keyin spikerlikdan iste’foga chiqqan Bir yil o‘tib, prezident saylovlarida So‘ronbay Jeenbekov g‘olib bo‘lgan.