Afg‘onistonda hokimiyatni qo‘lga kiritgan “Tolibon” muntazam qurolli kuchlarni shakllantirish uchun maxsus komissiya tuzdi. Bu haqda 9-dekabr kuni “Tolibon” Mudofaa vazirligining matbuot markaziga tayanib, “Interfaks” xabar berdi.
“Milliy mudofaa vazirligi rahbarligida Afg‘oniston milliy armiyasini shakllantirish bo‘yicha foydali va samarali rejalarni taqdim etish uchun bugun rasman 20 kishidan iborat ishchi qo‘mita tashkil etildi”, — deyiladi xabarda.
“Ushbu 20 kishidan iborat qo‘mita mamlakat xalqining xavfsizligi va osoyishtaligini ta’minlash maqsadida Mudofaa vazirligi tarkibida hukumat va islomiy tizim ehtiyojlaridan kelib chiqqan holda, imkon qadar qisqa vaqt ichida fidoyi, intizomli, qurollangan, halol va mas’uliyatli armiyani shakllantirishga mas’uldir”, — deya xabar beradi harbiy boshqarma matbuot markazi.
Xabarga ko‘ra, 9-dekabr kuni Milliy mudofaa vaziri vazifasini bajaruvchi mavlaviy Muhammad Yoqub Mujohid Mudofaa vazirligi rahbariyatining birinchi yig‘ilishini o‘tkazgan, unda armiya korpusining komandirlari ishtirok etgan.
“Mudofaa vazirligi rahbari korpus rahbaryatining ishlarni jadallashtirish, brigada va harbiy qismlarni shakllantirishni faollashtirish, chegaralarni nazorat qilish va qo‘riqlash, xavfsizlikni yanada ilg‘or usullar bilan ta’minlash bo‘yicha hisobot va takliflarini eshitib, zarur ko‘rsatmalar berdi”, — deyiladi matbuot markazining xabarida.
Shu kuni Mudofaa vazirligida “Tolibon” Qurolli Kuchlari bosh shtabi boshlig‘i Qori Fassihuddin Fitrat harbiy-havo kuchlari bosh qo‘mondoni Mavlaviy Omonuddin Mansurni shaxsiy tarkibga rasman tanishtirgan.
“Xorijga chiqib ketgan harbiy havo kuchlari uchuvchilari va ekipajlari o‘z uylariga va o‘z vazifalariga qaytishi, o‘z tizimi va mamlakatini qurishda ishtirok etishi mumkin, chunki ular uchun hech qanday xavf yo‘q”, — deya shtab boshlig‘ining so‘zlaridan iqtibos keltirilgan harbiy boshqarma saytida.
Avvalroq “Tolibon” Afg‘oniston sobiq hukumatining harbiylari va amaldorlariga nisbatan zo‘ravonlik qilgan barchani, jumladan, jangarilarni ham qattiq jazolashini e’lon qilgandi.
“Mujohidlar amnistiya to‘g‘risidagi farmonni bajarishga to‘la sodiqdir, sobiq ma’muriyat amaldorlari (“Tolibon”ga nisbatan) avvalgi qarshiliklari tufayli ta’qib qilinmaydi”, — deya ma’lum qilgan “Tolibon” tashqi ishlar vazirligi matbuot kotibi Abdulqahhor Balxiy.
Izoh (0)