Putin mehnat muhojirlari rus tili va Rossiya qonunlarini o‘z vatanida o‘rganib kelishi zarurligi haqida gapirdi

Rossiya prezidenti Vladimir Putin mamlakatdagi mehnat muhojirlari bilan bog‘liq vaziyatga izoh berdi, deb yozadi Nuz.uz.

Fuqarolik jamiyatini rivojlantirish va inson huquqlari bo‘yicha kengash yig‘ilishida Putin kengash raisi Valeriy Fadeyevning iqtisodiyotda muhojirlarga ehtiyoj borligi haqida ma’lumotlar yetarli emas, degan mazmundagi gaplariga javob qaytardi.

Rossiya prezidentining so‘zlariga ko‘ra, buni mutlaqo to‘g‘ri deb bo‘lmaydi — bunday ma’lumotlarni o‘z ichiga olgan hisobotlar bosh vazir o‘rinbosari Marat Xusnullin tomonidan muntazam ravishda taqdim etiladi. Shu bilan birga, qurilish majmuasining xorijiy ishchi kuchiga bo‘lgan ehtiyojiga alohida e’tibor qaratilmoqda.

“Ammo bu borada o‘z xavotirlarini bildirayotganlarning fikriga to‘liq qo‘shilaman. Bu masalada MDHdagi hamkasblarimiz bilan hamkorlikda ish olib borishimiz kerak. Bizga kelib ishlashni istovchilar mamlakatimizga kelishga va bu yerda ishlashga o‘z vatanidayoq tayyorgarlik ko‘rishi, rus tilini, qonunlarimizni o‘rganishi, o‘z huquqlarini bilishini, Rossiya Federatsiyasining qonun-qoidalariga, urf-odatlarimizga rioya qilish bo‘yicha jamoat tashkilotlarimiz va davlat organlarimiz ularga qanday yo‘nalish berishidan (muhojirlarning) xabardor bo‘lishini ta’minlash zarur”, — dedi Putin.

Rossiya prezidentining ta’kidlashicha, bu borada u Hamdo‘stlik mamlakatlaridagi hamkasblari bilan doimiy muzokaralar olib bormoqda, O‘zbekiston prezidenti Shavkat Mirziyoyev hozirdanoq loyihaga ko‘maklashishga tayyorligini bildirgan. Tojikiston, Qirg‘iziston va Qozog‘iston bilan ham shunday hamkorlik yo‘lga qo‘yilgan.

“Ammo bu ushbu masalaga oid hamma narsa tugallangan degani emas, aksincha, bu faqat boshlanishi”, — dedi Vladimir Putin.

Avgust oyida Rossiyada muhojirlar uchun rus tilidan imtihon o‘tkazishning yangi qoidalari joriy etilgandi. Unga ko‘ra, muhojirlar endi rus tili, Rossiya tarixi va qonunchiligi bo‘yicha imtihonlarda beriladigan taxminiy savollarni oldindan bilib olishi mumkin. Imtihonlar yozma bo‘ladi, lekin Rossiyada uzoq vaqt qolishni istaganlar rus tilida muloqot qilish qobiliyatini ko‘rsatishi kerak.

Avvalroq Putin Rossiyaga kelgan mehnat muhojirlarini majburiy daktiloskopik (barmoq izlari bilan) ro‘yxatdan o‘tkazish to‘g‘risidagi qonunni imzolagandi. Shuningdek, endilikda Rossiyada ommaviy mushtlashuvlarda qatnashadigan muhojirlar mamlakatdan chiqarib yuboriladi.