Meksikaning Chiyapas shtatida 9-dekabr kuni yuzdan ortiq muhojirni olib ketayotgan tirkamali yuk mashinasi halokatga uchradi. Dastlabki ma’lumotlarga ko‘ra, 54 kishi halok bo‘lgan, deya xabar berdi Noticias MVS radiostansiyasi.
Radio ma’lumotlariga ko‘ra, ko‘pchiligi Gvatemala aholisi bo‘lgan noqonuniy muhojirlarni tashiyotgan yuk mashinasi yo‘l chetidagi devorga urilib, ag‘darilib ketgan. Qurbonlardan tashqari yana 58 kishi kasalxonaga yotqizilgan, uch nafarining ahvoli o‘ta og‘ir deb baholanmoqda.
Shu bilan birga, qutqaruv xizmatlari fojiaga ikkita yuk mashinasining to‘qnashuvi sabab bo‘lganini, shundan so‘ng ulardan biri devorga urilganini ma’lum qildi. Hodisa tafsilotlari aniqlanmoqda.
Meksika prezidenti Andres Manuel Lopes mamlakat janubidagi ushbu yirik avariyaga munosabat bildirdi. Davlat rahbari jabrlanganlar uchun barcha zarur yordam ko‘rsatilishini aytdi.
“Davlat rahbarining topshirig‘iga ko‘ra, fuqaro mudofaasi kuchlarining milliy koordinatori Laura Velaskes va ishchi guruh muhojirlar ishtirokidagi avtohalokat natijasida yuzaga kelgan favqulodda vaziyatni bartaraf etish uchun Chiyapasga jo‘nab ketdi”, — deya prezident matbuot xizmatidan iqtibos keltiradi OAV.
Noyabr oxirida Bolgariyada sayyohlik avtobusi YTHga uchrab, yonib ketgan edi. Oqibatda 46 kishi halok bo‘lgan.
Iyul oyida Turkiyada noqonuniy muhojirlar o‘tirgan mikroavtobus halokatga uchragandi. Oqibatda 12 kishi halok bo‘lib, 20 kishi jabrlangan. Avgustda esa Perudagi And tog‘larida avtobus jarlikka qulab tushgandi. Oqibatda 15 kishi halok bo‘lgan, uch kishi yaralangan.
Izoh (0)