Qozog‘iston fuqarolari mamlakatda atom elektr stansiyasining qurilishiga qarshi ovoz berdi, aholi elektrstansiyalarning boshqa muqobil energiya manbalarida ishlashining tarafdori ekanligini ma’lum qilgan.
Qayd etilishicha, Qozog‘istonda atom elektr stansiyasi masalalari yuzasidan maxsus komissiya tuzilgan, guruh qurilish muddati va joyi bo‘yicha ishlarni muvofiqlashtiradi. Biroq mamlakat aholisi AES qurilishiga qarshi chiqmoqda.
Qozog‘iston hukumatining mazkur yo‘nalishdagi qaroriga qarshi petitsiya e’lon qilingan.
“Qozog‘iston hukumatiga savollarimiz bor. Siz tinchlik zamonida Aris va Tarazda harbiy omborlardagi favqulodda holatlardan keyin AES qurib, qanday yo‘l bilan fuqarolar xavfsizligini ta’minlamoqchi bo‘layapsiz? Qanaqasiga poytaxtga feyerverklar olib kelishda odamlar xavfsizligini ta’minlay olmaganlar, ularning trassada portlashiga yo‘l qo‘yganlar AES qurib, fuqarolarning xavfsizligini kafolatlashi mumkin? Nima sababdan aynan AES qurish kerak, boshqa nisbatan xavfsizroq elektrstansiyalar barpo qilib, muammoga yechim topib bo‘lmaydimi?, – deyilgan petitsiyada.
Petitsiya ostiga imzo qo‘yganlar Qozog‘istonda aholining xavfsizligi to‘liq va asosli tarzda maksimal darajada kafolatlanmaydigan bo‘lsa AESning qurilishiga qarshi chiqishlarini bayon etishgan. Shuningdek, ular elektrstansiyalarning boshqa xavfsiz muqobilini qurish maqsadga muvofiqligini bildirgan.
2021-yil sentabr oyida Qozog‘iston prezidenti Qosim-Jo‘mart To‘qayev AES qurish masalasini ko‘rib chiqish vaqti kelgani, mamlakatga bunday elektrostansiyalar zarur ekanligini ma’lum qilgandi. Keyinchalik noyabr oyida u garchi aholi ushbu tashabbusni qo‘llab-quvvatlamayotgan bo‘lsa ham mamlakatda AES qurish yuzasidan qaror chiqarishga majbur bo‘lishini qayd etgan.
Sentabrda Qozog‘istonning Taraz shahri aholisi O‘zbekistonda birinchi atom elektr stansiyasi qurilishi boshlangani sabab o‘z xavotirini bildirgan. AESga qarshi mahalliy aholi o‘zbekistonliklar bunday keng ko‘lamli va xavfli loyihani qo‘shni davlatlar bilan hamkorlikda qurishi kerak, deb hisoblashini bayon etgandi.
Eslatib o‘tamiz, O‘zbekistonda ham 2022-yilda atom elktr stansiyasini qurish ishlari boshlanadi. “O‘zatom” bosh direktori stansiyaning birinchi energiya bloki 2028-yil dekabrda, ikkinchi bloki esa 2030-yil iyun oyida ishga tushirish rejalashtirilganini ta’kidlagan.
Izoh (0)