Қозоғистон фуқаролари мамлакатда атом электр станциясининг қурилишига қарши овоз берди, аҳоли электрстанцияларнинг бошқа муқобил энергия манбаларида ишлашининг тарафдори эканлигини маълум қилган.
Қайд этилишича, Қозоғистонда атом электр станцияси масалалари юзасидан махсус комиссия тузилган, гуруҳ қурилиш муддати ва жойи бўйича ишларни мувофиқлаштиради. Бироқ мамлакат аҳолиси АЭС қурилишига қарши чиқмоқда.
Қозоғистон ҳукуматининг мазкур йўналишдаги қарорига қарши петиция эълон қилинган.
«Қозоғистон ҳукуматига саволларимиз бор. Сиз тинчлик замонида Арис ва Таразда ҳарбий омборлардаги фавқулодда ҳолатлардан кейин АЭС қуриб, қандай йўл билан фуқаролар хавфсизлигини таъминламоқчи бўлаяпсиз? Қанақасига пойтахтга фейерверклар олиб келишда одамлар хавфсизлигини таъминлай олмаганлар, уларнинг трассада портлашига йўл қўйганлар АЭС қуриб, фуқароларнинг хавфсизлигини кафолатлаши мумкин? Нима сабабдан айнан АЭС қуриш керак, бошқа нисбатан хавфсизроқ электрстанциялар барпо қилиб, муаммога ечим топиб бўлмайдими?, – дейилган петицияда.
Петиция остига имзо қўйганлар Қозоғистонда аҳолининг хавфсизлиги тўлиқ ва асосли тарзда максимал даражада кафолатланмайдиган бўлса АЭСнинг қурилишига қарши чиқишларини баён этишган. Шунингдек, улар электрстанцияларнинг бошқа хавфсиз муқобилини қуриш мақсадга мувофиқлигини билдирган.
2021 йил сентябрь ойида Қозоғистон президенти Қосим-Жўмарт Тўқаев АЭС қуриш масаласини кўриб чиқиш вақти келгани, мамлакатга бундай электростанциялар зарур эканлигини маълум қилганди. Кейинчалик ноябрь ойида у гарчи аҳоли ушбу ташаббусни қўллаб-қувватламаётган бўлса ҳам мамлакатда АЭС қуриш юзасидан қарор чиқаришга мажбур бўлишини қайд этган.
Сентябрда Қозоғистоннинг Тараз шаҳри аҳолиси Ўзбекистонда биринчи атом электр станцияси қурилиши бошлангани сабаб ўз хавотирини билдирган. АЭСга қарши маҳаллий аҳоли ўзбекистонликлар бундай кенг кўламли ва хавфли лойиҳани қўшни давлатлар билан ҳамкорликда қуриши керак, деб ҳисоблашини баён этганди.
Эслатиб ўтамиз, Ўзбекистонда ҳам 2022 йилда атом элктр станциясини қуриш ишлари бошланади. «Ўзатом» бош директори станциянинг биринчи энергия блоки 2028 йил декабрда, иккинчи блоки эса 2030 йил июнь ойида ишга тушириш режалаштирилганини таъкидлаган.
Изоҳ (0)