Myanma sudi mamlakatning sobiq davlat maslahatchisi, 76 yoshli Aun San Su Chjini to‘rt yillik qamoq jazosiga hukm qildi. U harbiy to‘ntarishdan so‘ng hibsga olingandi, deb yozadi Meduza.
Siyosatchi ig‘vo qo‘zg‘ash va koronavirusga qarshi cheklovlarni buzishda aybdor deb topildi. Harbiylar nazoratidagi hukumat vakilining AFP’ga aytishicha, Aun San Su Chji xonimga har bir ayblov yuzasidan ikki yillik qamoq jazosi berilgan.
Myanmaning sobiq prezidenti, davlat to‘ntarishidan so‘ng hokimiyatdan chetlatilgan 70 yoshli Vin Min ham to‘rt yillik qamoq jazosiga hukm qilingan edi.
Aun San Su Chjiga nisbatan yana bir qancha ayblovlar ko‘rsatilgan, ular bo‘yicha qamoq jazosining umumiy muddati 100 yildan ortiq bo‘lishi mumkin. Myanmaning sobiq prezidenti singari davlat maslahatchisiga ham yangi ayblovlar e’lon qilish rejalashtirilmoqda.
Mart oyida Aun San Su Chji noqonuniy ravishda 600 ming AQSh dollari va undan biroz ko‘proq bo‘lgan mablag‘ga teng oltinlarni o‘zlashtirganlikda ayblangandi.
Aun San Su Chji 2016-yildan beri davlat maslahatchisi sifatida amalda Myanma hukumatini boshqarib kelayotgan edi. 2021-yil 1-fevralda harbiylar tomonidan uyushtirilgan davlat to‘ntarishidan so‘ng u hibsga olingan.
Myanmadagi davlat to‘ntarishidan keyin harbiy xuntaga qarshi norozilik namoyishlari boshlangandi. Shu fonda yangi hokimiyat mamlakatda internetni deyarli butunlay uzib qo‘ydi. Davlat to‘ntarishidan so‘ng mamlakatda 1300 ga yaqin odam halok bo‘ldi, yana 10 ming kishi hibsga olindi.
Izoh (0)