Xitoy AQShni sovuq urush mentalitetidan voz kechishga, uning rivojlanishini xolisona baholab, XXRga xayoliy raqib sifatida munosabatda bo‘lishni bas qilishga chaqirdi. Bu haqda Xitoy Tashqi ishlar vazirligi rasmiy vakili Van Venbinga tayanib “TASS” xabar berdi.
“Biz AQShni Xitoyga xayoliy raqib sifatida qarab, uni xoh asosli, xoh asossiz tilga olishni to‘xtatishga chaqiramiz”, — dedi diplomat. Shu tariqa u AQSh Qurolli Kuchlari shtab boshliqlari qo‘mitasi raisi general Mark Millining Xitoy tomonidan amalga oshirilgani aytilgan gipertovushli uchar apparat sinovlari Amerika tomonini xavotirga solayotgani haqidagi so‘zlariga izoh berdi.
“Biz AQShni sovuq urush mentalitetidan va nol qiymatli o‘yinlaridan voz kechishga, Xitoyning milliy mudofaasiga xolisona qarashga, ko‘proq o‘zaro ishonch va hamkorlikni rag‘batlantiradigan, shuningdek, butun dunyoda tinchlik, barqarorlik va taraqqiyotga ko‘maklashadigan choralar ko‘rishga chaqiramiz”, — dedi Van Venbin.
16-oktabr kuni Britaniyaning Financial Times gazetasi Xitoy armiyasi yozda ikki marta gipertovushli qurollarni sinovdan o‘tkazgani haqida xabar berdi. Gazetaning yozishicha, sinovlar 27-iyul va 13-avgust kunlari o‘tkazilgan. 18-oktabr kuni Xitoy Tashqi ishlar vazirligi matbuot kotibi Chjao Litszyan avgust oyida Xitoy yangi turdagi qurolni emas, balki kosmik apparatni sinovdan o‘tkazganini aytdi.
21-oktabr kuni Van Venbin gazetaning ikki sinov haqidagi da’vosiga izoh berar ekan, bu ma’lumotlar haqiqatga to‘g‘ri kelmasligini yana bir bor ta’kidladi. Uning so‘zlariga ko‘ra, Xitoy kosmik apparatdan qayta foydalanish texnologiyasini sinab ko‘rish uchun kosmik kemani sinovdan o‘tkazgan.
General Milli keyinroq Bloomberg agentligiga bergan intervyusida Xitoyning gipertovushli uchar apparatni sinovdan o‘tkazgani AQSh rahbariyatida Sovet Ittifoqi tomonidan Yerning birinchi sun’iy yo‘ldoshi uchirilgani bilan deyarli bir xil taassurot qoldirganini tan oldi. AQSh prezidenti Jo Bayden ham Xitoyning gipertovushli raketalarni sinovdan o‘tkazganidan xavotir bildirdi.