Жо Байден администрацияси 2022 йили Пекинда ўтказиладиган Олимпиада ўйинларига дипломатик бойкот эълон қилади. Бу ҳақда CNN телеканалига таяниб, «Коммерсантъ» хабар берди. Таъкидланишича, бойкот спортчиларга тааллуқли бўлмайди.
Телеканал маълумотларига кўра, Миллий хавфсизлик кенгаши баёнотни «шахсий тартибда» муҳокама қилган. Унинг вакиллари ушбу маълумотга изоҳ беришдан бош тортган. Дипломатик бойкот расмий шахсларнинг Олимпиада ўйинларига бормаслигини билдиради.
Эслатиб ўтамиз, 16 ноябрь куни Washington Post газетаси бир нечта манбаларга таяниб, Байден маъмурияти яқин орада 2022 йилги Пекин Олимпиадасига дипломатик бойкот эълон қилмоқчилиги ҳақида хабар берганди. Бу президентнинг, АҚШ ҳукуматининг бошқа бирорта амалдори Пекиндаги Олимпиада ўйинларида иштирок этмаслигини англатади. Маъмурият манбаларига кўра, Байден мазкур қарорни ой охиригача тасдиқлаши кутилаётган эди. Кейинроқ АҚШ президенти Жо Байден АҚШ Хитой билан зиддиятига қарамай Пекин Олимпиадасига делегация юбориши ёки йўқлиги ҳақида журналистларнинг саволига жавоб берган. «Мен делегацияман ва мен буни ҳал қилганман (I’m the delegation and I dealt with it)», — деган Байден. У ўз баёнотининг маъносини тушунтирмаган.
Пекин ва Вашингтон ўртасидаги муносабатларнинг сўнгги кескинлашуви Хитой қўшинларининг Тайван бўғозидаги фаоллиги ортгани билан боғлиқ. Октябрь ойи бошида Тайван Мудофаа вазирлиги Хитой самолётлари томонидан чегарани кесиб ўтиш ҳолатлари рекорд даражада қайд этилгани ҳақида хабар берган. Шундан сўнг, Байден Хитой томонидан тажовуз содир бўлган тақдирда Қўшма Штатлар Тайванни қўллаб-қувватлашга тайёрми ёки йўқми, деган саволга ижобий жавоб берган, бироқ у «ягона Хитой» тамойилини қўллаб-қувватлашини ҳам айтган.
Изоҳ (0)