2-dekabr kuni Berlinda Angela Merkelning Germaniya kansleri lavozimidan ketishi munosabati bilan tantanali marosim bo‘lib o‘tdi, deb xabar beradi Meduza. “Kechki shafaq” nomli marosimni bundesver, Germaniya qurolli kuchlari tashkillashtirgan. Ushbu marosim — Merkelning 16 yillik faoliyatidan keyin hukumatni tark etishidan oldingi muhim voqeadir. U kansler lavozimini rasman 8-dekabr kuni tark etadi.
Koronavirus tarqalishining oldini olish bo‘yicha joriy etilgan cheklovlar sabab marosim cheklangan formatda o‘tkazilgan. Unga 200 yaqin odam, jumladan, Merkelning boshqaruv davrida federal vazirliklarda ishlagan 52 kishi ham tashrif buyurgan.
Merkelning qisqa nutqidan so‘ng, harbiy orkestr bir nechta kompozitsiyani ijro etdi, jumladan, ularning uchtasini Merkel tanlagan. Kansler ketishidan oldin “nemis pankining onasi” Nina Xagenning “Du hast den Farbfilm vergessen”, shuningdek, Xildegard Knefning “Fur mich soll’s rote Rosen regnen” qo‘shiqlarini va nasroniylar madhiyasi “Großer Gott, wir loben dich”ni ijro etishni so‘ragan.
“Kechki shafaq” marosimi — nemis harbiylar fuqarolarga ko‘rsatishi mumkin bo‘lgan eng oliy hurmat namunasidir. Uning tarixi XVI asrga borib taqaladi, biroq nemis kanslerlari bunga 1998-yildan boshlab, Germaniya hukumati tepasidan Gelmut Kol ketganiden beri musharraf bo‘lgan.
Ma’lumot uchun, Merkel 2005-yildan beri (to‘rt muddat) Germaniya kansleri bo‘lgan, shuningdek, Xristian-Demokratik Ittifoqiga (XDI) raislik qilgan. U 2018-yilda keyingi muddati tugagach kanslerlik lavozimidan ketishini e’lon qilgandi.
27-sentabr kuni bo‘lib o‘tgan Germaniyadagi parlament saylovlarida amaldagi moliya vaziri Olaf Shols rahbarligidagi Sotsial-demokratik partiya (GSDP) g‘alaba qozondi. Unga saylovchilarning 25,7 foizi ovoz berdi, ushbu natijaga muvofiq u yangi Bundestagda 206 ta o‘ringa ega bo‘ladi.
26-oktabr kuni Germaniya prezidenti Frank-Valter Shtaynmayer Merkelga hukumat rahbari sifatidagi muddati rasman tugagani to‘g‘risidagi maktubni topshirdi.
Izoh (0)