Kreml “xorijiy agent” deb e’lon qilingan ommaviy axborot vositalari xodimlarini Vladimir Putinning yillik matbuot anjumanida ishtirok etishga taklif qiladi, lekin hammasini ham emas. Bu haqda Rossiya prezidentining matbuot kotibi Dmitriy Peskov jurnalistlarga bergan intervyusida ma’lum qildi.
“Ha, shubhasiz (taklif qilamiz). Lekin albatta, hammasini emas, xorijiy agentlar juda ko‘p. Ammo asosiy ommaviy axborot vositalari, jumladan, prezidentlik mavzusini yoritishda faol ishtirok etadiganlar — ha, ular taklif qilinadi. Bu maqom ularning faoliyatiga taqiq qo‘yish emas, buni bir necha bor takrorlaganmiz”, — dedi Peskov.
Kreml matbuot kotibi tadbirga “xorijiy agentlar” deya e’lon qilingan aynan qaysi OAV vakillari taklif etilishiga aniqlik kiritmadi.
Vladimir Putinning bu yilgi katta matbuot anjumani 23-dekabr kuni Manejda bo‘lib o‘tadi. Avvalroq Peskov davom etayotgan pandemiya sharoitida Kreml matbuot anjumani ishtirokchilari sonini qisqartirishga va unga bepul akkreditatsiyani bekor qilishga qaror qilganini aytgandi. Prezident ma’muriyati tadbirga 500 nafardan ortiq bo‘lmagan jurnalistlarni taklif qilmoqchi. Ularning barchasi uchtadan PZR-testini topshirishi kerak.
Eslatib o‘tamiz, oktabr oxirida AQSh va uning NATOdagi ittifoqchilari, shuningdek, Ukraina Rossiyani “mustaqil jurnalistlar va ommaviy axborot vositalariga nisbatan ta’qiblari kuchaygani” uchun tanqid qilgandi. Ularning fikricha, Rossiya hukumati rossiyaliklarning mustaqil jurnalistikadan foydalanishini cheklamoqchi va shu maqsadda mamlakatda xorijiy OAV agentlari to‘g‘risida qonun joriy qilgan
Izoh (0)