Даниянинг Saxo Bank инвестиция банки 2022 йил учун «ҳайратга солувчи прогнозлар»ни эълон қилди. 10 та башоратдан иборат жамланмани банкнинг ўзидагилар «молиявий бозорларга катта таъсир ўтказиши мумкин бўлган эҳтимолдан узоқ ҳодисалар» деб атайди. Ҳар йилги прогнозлар 19 марта эълон қилинмоқда. Meduza уларнинг энг эътиборга моликларини тақдим этди.
Facebook бумерлар учун платформага айланади
Facebook «кекса бумерлар» учун платформага айланиб бормоқда — унинг фойдаланувчиларни доим бир хил ёки ёлғон контентни кўришга ундовчи алгоритмлари ёшларни ижтимоий тармоқдан узоқлашишига мажбур қилмоқда. Ижтимоий тармоқ ёшлар ва 40 ёшдан катталар ўртасидаги маданий қарама-қаршилик марказида қоляпти — ёшлар унга худди фейк янгиликлар ва «хасис» корпорация сифатида қарамоқда.
Инвесторлар Facebook’нинг янги «она» компанияси Меtа — ёш авлодни шиддат билан йўқотаётганини тушуниб турибди, демак бу келажакдаги потенциалнинг йўқотилиши ҳисобланади. Юқорида қолишга бўлган уриниш сабаб Меtа Snapchat ёки TikTok’ни харид қилмоқчи ва миллиардлаб долларларни ўз сервисига ёшларни қайтариш учун сарфлаяпти. Шу билан бир қаторда, у асосий мақсади фойдаланувчилар ҳақида маълумот тўплаш бўлган «метаолам»ни яратиш билан шуғулланмоқда.
Натижада Меtа ўз қийматининг 30 фоизини йўқотяпти ва унинг хизматларини алоҳида тузилмаларга бўлиш тавсия этилади — Марк Цукербергнинг монополия ҳақидаги орзулари шундай барбод бўлади.
Умр кўриш давомийлигини 25 йилга ошириш борасидаги тиббиёт ютуғи
2022 йилда тиббиётда улкан силжиш содир бўлади — ҳужайра даражасидаги жараёнларни бошқариш ва уларнинг умрини узайтириши мумкин бўлган дори воситаларидан коктейл яратилган. Лаборатория сичқонлари устида ўтказилган тажрибалар уларнинг умри давомийлиги 30 фоизга ошганини кўрсатган. Инсонлар учун бу умрнинг 25 йилга узайишини англатади.
Бундан ташқари, янги дори воситаси қаришни секинлаштиради ва қари ҳужайраларни ёшартиради. ДНКни таҳрирлашнинг янги усуллари ёш билан боғлиқ кўплаб касалликлардан қутулиш имконини беради.
Ўртача умр кўришнинг истиқболи ҳақиқий ютуқ бўлса-да, ахлоқий ва молиявий муаммоларни келтириб чиқаради. Агар ҳар бир киши ўртача 115 йил яшаса — бу пенсия тизими учун нимани англатади? Шунча одамни боқиш учун озиқ-овқат етадими? Янги доридан ҳамма ҳам фойдалана олиши керакми?
Гипертовушли технологияларнинг ривожланиши янги совуқ уруш ва космик пойгага олиб келади
Хитой томонидан гипертовушли ракетанинг синовдан муваффақиятли ўтказилиши АҚШ учун кутилмаган «совға» бўлди, космосга чиқишга қодир гипертовушли аппаратлар Вашингтон ва Пекин ўртасидаги рақобатнинг нафақат иқтисодий, балки мудофаа соҳасининг марказида бўлади. Пойгага илғор ҳарбий технологияларга эга бошқа «ўйинчилар» ҳам қўшилади: Россия, Ҳиндистон, Исроил ва Европа Иттифоқи.
Гипертовушли технологиянинг ривожланиши совуқ уруш давридан бери мавжуд кўп йиллик «статус-кво»нинг бузилишига олиб келади. Улар ўзаро ишончли ҳалокатнинг асосий принципига таҳдид солади — гипертовушли ракета ёрдамида биринчи ядровий зарба берилган тақдирда, қитъалараро баллистик ракеталарнинг жавоб ҳужумини тўлиқ бартараф этиш мумкин. Шу сабабли пойга оммавийга айланади: ҳеч ким ўзини ортда қолаётгандек ҳис қилишни истамайди.
Бу гипертовушли қуролларни яратиш билан шуғулланувчи компанияларнинг жадал ўсишига, анъанавий қуролланишга эга ҳарбий кемалар ва самолётлар учун қурилмалар ишлаб чиқарувчи компанияларнинг эса қулашига олиб келади.
АҚШда конституциявий инқироз бошланади
Демократлар ва республикачилар ўртасидаги қарама-қаршилик ўз чегарасига етиб бормоқда. Конгресс учун ўтказиладиган оралиқ сайловларда республикачилар ғолиб чиқиш учун барча нарсага тайёр, демократлар қўрқувни уйғотиш бўйича у қадар машҳур бўлмаган кампаниясини олиб боряпти.
Сайловлардан кейин бир ёки иккала томон ҳам овозлар натижасининг тасдиқланишига қарши чиқиш қилади. Натижада Конгресснинг янги таркибини шакллантириш мумкин эмас ва у режадагидек 2023 йилнинг 3 январидан иш бошлай олмайди.
Жо Байден мамлакатни президентлик декретлари ёрдамида бошқаришни давом этади. АҚШдаги демократия тўхтатилган — шу сабабли Демократлар партияси сайловлар натижасининг Олий судда кўриб чиқилишига қарши чиқмоқда, чунки унда консерватив судьялар ҳукмронлик қилади. Мамлакатни кенг кўламли конституцион инқироз қамраб олмоқда.
Америкалик фаоллар ўзгарувчан бўлиб бормоқда, доллар тушиб кетаётган бир вақтда АҚШ облигацияларининг даромадлилиги ортяпти.
Европа Иттифоқи пенсия жамғармаларидан тўлдириб бориладиган «Суперфонд»ни яратади
АҚШ томонидан Европага совуқ уруш даврида тақдим этилган «хавфсизлик соябони» йўқолиши мумкин, чунки Вашингтоннинг асосий ҳарбий ва иқтисодий рақобатчисига дунёнинг бошқа чеккасида жойлашган Хитой айланмоқда. Европа Иттифоқи мустақил равишда мудофаани мустаҳкамлаш ва бир вақтнинг ўзида энергия инқирози бошланишидан зарар кўрган иқтисодларга туртки бериш йўлларини қидирмоқда.
Франция президенти Эммануэль Макрон Италия бош вазири Марио Драги қўллаб-қувватлови остида қиймати 3 триллион евро бўлган Европа Иттифоқи «Суперфонди»ни яратишни таклиф қилмоқда. У мудофаани таъминлаш билан бирга, иқлим ўзгариши муаммолари ва соф энергияга ўтишга ёрдам беради. Европа аҳолисининг қариб бораётгани, шунингдек, солиқларнинг аллақачон юқорилиги ҳисобга олинса, сиёсатчилар даромад солиғини ошириш орқали фондни молиялаш имконсиз бўлишини тушунишади.
Франция 40 ёшдан катта барча ишчиларнинг пенсия активларининг бир қисмини «Суперфонд»нинг паст даромадли облигацияларига мажбурий ўтказишни таклиф этяпти, бу Евроиттифоқнинг ўзининг облигациялари ҳисобланади. Тизим шу қадар муваффақиятли бўлмоқдаки, Европада даромад солиғи секин-аста камаймоқда.
Spotify NFT асосидаги мусиқаларни тарқатувчи сервислар сабаб касодга учрайди
Мусиқачилар стриминг платформалари тингланган мусиқалардан келаётган даромаднинг 75 фоиздан ортиғини ўзига олаётганидан норози бўлмоқда, шу сабабли улар мусиқаларини NFT асосидаги сервислар ёрдамида тарқатиб, тингловчиларга тўғридан-тўғри рақамли ҳуқуқларни сотмоқда.
Бу мусиқачиларга реал вақт режимида даромад олиш ва уни ўртакашлар билан бўлишмаслик имконини беради, тингловчилар эса ўз пуллари тўғридан-тўғри ижрочига бораётганини билиб туради.
2022 йилда NFT асосидаги сервислар орқали ўз мусиқасини Кети Перри, Жейсон Деруло ва The Chainsmokers тақдим этади, қолган қўшиқчилар ўз композицияларини касод бўлаётган анъанавий оқимли платформалардан қайтариб оляпти: Spotify бир йил давомида ўз қийматининг 33 фоизидан айрилади. Инвесторлар фильмлар, китоб ва бошқа контентларни сотишда ҳам NFT’да потенциални кўрмоқда.
Изоҳ (0)