AQSh Moliya vazirligi Belarus va Yevropa Ittifoqi chegarasida yuzaga kelgan migratsiya inqirozi sabab 20 kishiga, 12 ta tashkilot va uch nafar belarus samolyotiga nisbatan sanksiyalarni joriy etdi, deb xabar beradi Meduza. Moliya vazirligining versiyasiga ko‘ra, yangi sanksiyaga aloqadorlar Yevroittifoqqa noqonuniy migratsiyani tashkillashtirishda ishtirok etgan.
AQShning sanksiyalar ro‘yxatidan boshqalar qatori “Prezident sport klubi” rahbari Aleksandr Lukashenkoning o‘rtancha o‘g‘li Dmitriy ham kiritilgan (tashkilotning o‘zi ham ro‘yxatdan o‘rin olgan). Bundan tashqari, AQSh “Belarus kaliy kompaniyasi” “Transaviaeksport”, “Slavkaliy” va “Beltexeksport” kompaniyalariga nisbatan ham sanksiya qo‘llagan.
Yevroittifoq rasmiylari 11 ta tashkilot va 17 nafar jismoniy shaxsga, jumladan, Belarus aviakompaniyasi “Belavia” va Suriyaning Cham Wings aviatashuvchisiga, mamlakat TIV va chegara xizmati xodimlari, sudyalarga sanksiya joriy etgan. Sanksiyalarga, shuningdek, Buyuk Britaniya va Kanada ham qo‘shilgan.
AQSh, YI, Buyuk Britaniya va Kanadaning qo‘shma bayonotida “Lukashenko rejimidan Yevroittifoq bilan chegarada noqonuniy migratsiyani tashkillashtirishni zudlik bilan va to‘liq to‘xtatish” talab qilingan.
Eslatib o‘tamiz, 8-noyabr kuni ertalab Belarus va Yevropa Ittifoqi davlatlari chegarasida vaziyat keskinlashdi. Belarus ommaviy axborot vositalari mamlakatning Polsha bilan chegarasi tomonga harakatlanayotgan muhojirlar karvoni aks etgan videolarni e’lon qildi. 11-noyabr kuni Buyuk Britaniya, AQSh va Yevropa Ittifoqi davlatlari Belarus hukumatini Polsha—Belarus chegarasidagi migratsiya inqirozini sun’iy ravishda yaratganlikda aybladi.
Mavzuga doir:
- “Belarus politsiyasi juda yaxshi. Belarusning o‘zi esa juda chiroyli”. Afrika va Yaqin Sharqdan kelib, Minskda qolib ketgan minglab migrantlar qanday yashayapti va nima xohlayapti?
- Belarusda Iroqqa qaytishni istamagan muhojirlar miting uyushtirib, ularni Yevropa Ittifoqiga kiritishni talab qildi (video)
Izoh (0)